Александар Кондев, фотограф, реши дека протестите на младите луѓе во Македонија против режимот заслужуваат признание и да останат како траен документ кој ќе ги поттикнува следните генерации да не се откажуваат од борбата за слобода и демократија.
Кондев од местото каде што ќе биде поставена изложбата на 12 април, паркот на Жена-борец кај споменикот на Прометеј, раскажа за мотивите, идејата и начинот на одвивање на мултимедијалниот настан што ќе започне во 17 часот.
„Од страната на Собранието ќе биде фотографија со полициски кордон за да се прикаже арената на настаните. Од левата страна, кај споменикот на АСНОМ ќе биде поставено долго платно со фотографии на младите со знамиња во рацете, што беа токму на истиот споменик кога се фотографирани. Десно, кај споменикот на основачите на ТМРО, односно ВМРО, ќе биде поставено платно со улицата „11 Октомври“ со знамиња и луѓе што протестираат. Кога ќе погледнеме кон споменикот на Прометеј, под него ќе биде платно со фотографии на ноќните палења на факелите, симболично прикажувајќи ги вистинските Прометеи со пламенот на слободата… Во кругот околу фонтаната ќе бидат поставени фотографии од протестот за Мартин Нешковски па сè до Шарената револуција со сиот свој шарм и фолклор“, објасни Кондев.
„Перформансот бара вистинските учесници да дојдат, да се препознаат на платната и да стават свој потпис на Револуцијата“, рече Кондев повикувајќи ги сите граѓанки и граѓани од 17 до 19 часот заеднички да ја одбележат борбата за демократија и слобода, а доколку не се во можност да ја посетат изложбата во Музејот на Град Скопје, чие отворање ќе биде во 20 часот.
Биљана Јордановска
