Министерството за труд и социјална политика денеска организираше средба во Заводот Демир Капија, на која присуствуваа министерката Царовска, заменик министерот за локална самоуправа Дејан Павлевски и градоначалници и претставници на општини во кои постои можност за вклучување во првата фаза на деинституционализацијата.
Мила Царовска изрази благодарност што голем дел од поканетите се одзваа на средбата, која за прв пат се случи токму во институција чија трансформација е неопходна.
„Целта е општините да се подготват за спроведување на деинституционализацијата, која подразбира создавање на социјални, здравствени, образовни и други услуги во самите локални заедници“ изјави Царовска. 
Според Царовска, процесот не е едноставен, но сите вклучени страни треба да излезат во пресрет на потребите на нашите најранливи сограѓани и да ги почитуваат нивните основни човекови права.
Пред претставниците на општините беше презентирана нацрт Стратегијата за деинституционализација, во која се дефинирани стратешките столбови на реформата: трансформација и затворање на институциите, преселба на корисниците во мали групни домови во општините, развој на услуги во општините и заедниците и спречување на идна институционализација.
Настанот е организиран преку проектот за Техничка помош за поддршка на процесот на ДИ во социјалниот сектор, финансиран од Европската унија.
А.П.
