„Младинскиот Образовен Форум е организација која што работи на промоција на критичкото размислување, па како една од активностите кои што ги правиме во насока на тоа е токму оваа работилница што се случува во склоп на форумот за невладини организации“, изјави Стефани Спировска од МОФ.
Работилницата насловена „In video veritas“, се одржа во просториите на Општина Велес и имаше за цел да ги информира младите за тоа што се дезинформации, како да ги препознаат, на кој начин можат да се информираат себеси како да прават разлика помеѓу информации и дезинформации, и да ги поттикнат да размислуваат зошто истите се штетни.
„Самата работилница која што трае 3 дена, е составена од два дела – теоретски и практичен дел, со тоа што во теоретскиот дел се поминуваат токму тие содржини, а практичниот дел ги учи како повеќе како да се создаде едно видео преку кое ќе можат да испратат порака и да дадат информации до јавноста како да се справат и со дезинформации и како да ги препознаваат“, додаде Спировска.
Според Спировска, препознавањето на дезинформација е многу поблиско и сродно со критичкото размислување, и ако имаме млади кои се способни критички да размислуваат ќе имаме млади кои што ќе можат да препознаат информација од дезинформација, и дека вакви работилници кои во својот фокус ја имаат медиумската писменост се многу значителни и потребни особено сега кога во самото образование не се среќаат такви содржини.
Ангела Петровска
камера: Дехран Муратов
монтажа: Маја Ивановска
фотографија: Ванчо Џамбаски
