Здружението на новинарите на Македонија остро ја осудува вербалната закана за убиство упатена кон новинарите и уредникот на 1ТВ Ацо Кабранов, од бизнисменот Зоран Азманов.
„Овие закани претставуваат брутално кршење на правата на новинарите и обид за цензура во медиумите кои се обидуваат критички да ја опсервираат работата на бизнис заедницата. Бараме од Министерството за внатрешни работи и Јавното обвинителство на Македонија активно да го следат овој инцидент во насока на брза разрешница. Само со строга санкција на нападите и заканите може да се спречи дополнително насилство кон новинарите“, велат од ЗНМ.
Оттаму апелираат до граѓаните кои сметаат дека медиумите известуваат непрофесионално да се обратат до Советот на честа при ЗНМ, како и Советот за етика во медиумите.
„Медиумската саморегулација е најдобриот начин да се заштитат граѓаните од евентуално непрофесионално новинарство и непринципиелна работа на медиумите“, додаваат од ЗНМ.
Пред некој ден 1ТВ објави дека бизнисменот Азманов му се заканил на уредникот Кабранов дека ќе „преземе мерки“ за објавите против него.
Здружението на новинарите на Македонија (ЗНМ) остро го осуди и инцидентот што се случи пред два дена за време на манифестација по повод големиот христијански празник Богојавление-Водици во Скопје, во кој беше повредена новинарката Мирјана Мирчевска-Јовановиќ, од Канал 5 телевизија.
Инцидентот го осудија и Самостојниот синдикат на новинари на Македонија (ССНМ), Советот за етика во медиумите во Македонија (СЕММ), Агенцијата за аудио и аудиовизуелни медиумски услуги (АВМУ), Македонската асоцијација на новинари (МАН), како и политичките партии СДСМ и ВМРО-ДПМНЕ.
Д. М.
