Прва посета на грчки премиер во Северна Македонија
Пристигнувањето на Алексис Ципрас, премиерот на Република Грција, со 15 минути доцнење, се проследи со голема еуфорија и борба за подобро место меѓу камерманите, фоторепортерите и новинарите за обележување на овој историски чин.
И покрај тоа што имаше многу забелешки за организацијата и протоколот за медиумите, сепак, како добри домаќини, предност им се даде на грчките медиуми и странските известувачи, а домашните се снаоѓаа. Колегијаноста и разбирањето меѓу грчките и македонските известувачи беше очигледна.
На пречекот од македонска страна, присуствуваа и министерката за одбрана, Радмила Шекеринска, министерот за внатрешни работи, Оливер Спасовски, министерот за информатичко општество, Дамјан Манчевски…
Со Ципрас, дојде и неговата партнерка Перистера Бети Базијана, која ќе го помине денот со сопругата со Зорица Заева, сопругата на премиерот.
На заедничката прес-конференција со Алексис Ципрас, Зоран Заев изјави дека сите ќе имаат придобивки од договорот, од енергетските објекти, од фабриките во двете земји, од трговската размена, од новите гранични премини и туризмот.
Заев додаде дека не верува дека Договорот од Преспа ќе биде поништен при промена на власта, бидејќи договорот носи само придобивки.
Грчкиот премиер Ципрас изјави дека долго време е изгубено и сега мора да трчаме напред и дека она што изгледало невозможно, денеска стана реалност.
„Спомениците кои се однесуваат на античка Македонија и нивното специфично обележување ќе расчисти дека тие се дел од грчкото минато и култура што е всушност светска култура. Ние сакаме да се зголеми бројот на Грци кои ке ја посетуваат Северна Македонија, дека многу повеќе Грци ќе доаѓаат во Скопје, Струмица“, додаде Ципрас.
„Покрај тешкотиите има многу грчки претприемачи кои во моментот работат и се активни во Северна Македонија. Сепак, мојата делегација носи со себе повеќе од стотина претприемачи со цел да се постигне подобра соработка и односи во иднина. Воспоставивме и координативен комитет за наша соработка, што ќе врши надзор и ќе ги поддржува таквите потфати во рамки на економските односи“, изјави Ципрас.
Посетата на грчкиот премиер Алексис Ципрас, ја поздрави и претседателскиот кандидат Стево Пендаровски, преку видео обраќање.
„Вратата кон сигурна иднина е отворена. Градиме мостови и пријателства со соседите, наскоро влегуваме во НАТО и започнуваме преговори со Европската унија. Можеме да избереме дали ќе продолжиме напред кон подобар живот за сите граѓани или ќе ја затвориме вратата и ќе останеме во истото место каде што сме со години. Верувам дека изборот на 21 ќе биде заедно да продолжиме напред“, рече Пендаровски.
Покрај големиот интерес од македонските и грчките медиуми за посетата на Ципрас, дваесетина демостранти се обидоа да го искажат својот став проив промената на името и присуството на грчкиот премиер во државата.
Полицијата го очекуваше нивното присуство, па не им дозволи да се приближат до Владата.
Дескоска: Прашање на пратеничките групи и политичките партии е дали ќе сакаат да се приклучат во евроинтергативните процеси
Министерката за правда Рената Треневска-Дескоска во изјава за медиумите, пред започнувањето на конференцијата „Заедничка заложба за подобри достигнувања во судството“, изјави дека не се согласува со тоа дека треба да заврши мисијата и работата на СЈО.
„Препораките кои ги добивме се многу јасни и се упатени јавно дека она што меѓународната заедница ќе го цени како позитивен исчекор, но и како одлучност во борбата против криминалот и корупцијата, е праќање на сигнал дека било која влада не треба да се плаши од борбата против корупцијата бидејќи секој тип на незаконско делување во рамки на било која влада треба да биде казнето со организирање на јавно обвинителство кое ќе гони сторителите на висока корупација“, додаде Дескоска.
ЦИВИЛ – активности
Граѓаните набљудуваат, снимаат, објавуваат во Скопската чаршија
Утре, со почеток во 18 часот во 4 април, во 18 часот во старата скопска чаршија, пред платото на Универзитетот на ЈИЕ, ЦИВИЛ – Центар за слобода ќе ги проектира досега наградените трудови на граѓанските новинари во рамките на проектот Граѓански објектив, а ќе биде достапен да одговори на прашањата на заинтересираните граѓани за проектот и за условите за учество во месечните натпреварувачки циклуси во проектот.
Со музика, проекции и разговори, ЦИВИЛ ќе се обиде да го промовира граѓанското новинарство, но и да им објасни на граѓанките новинарки и новинари како можат да помогнат во изборното набљудување за престојните претседателски избори.
Хроника
И официјално вчера (1 април) започна кампањата на претседателските кандидати. Секој од кандидатите избра различно место за промовирање на својата кампања, Силјановска-Давкова во својот роден Охрид, Блерим Река во Скопје, и Стево Пендаровски, во Прилеп.
Настапите на секој од кандидатите беа различни, а атмосферата помеѓу насобраните поддржувачи и гласачи очигледно беше во најмала рака, ентузијастична, кај едните со примеси на свечена конвенција и презентација на кандидатот пред одредена јавност, кај другите со овации како по победа на избори, кај третите дури како и на слет – организација при давање штафета на Другарот Тито.
А. Петровска
фотографија: Б. Јордановска
