Со барања за амнестија нема право и правда во нашата држава 

Услов за отпочнување на преговорите со ЕУ е донесување Закон за Јавно обвинителство кој ќе овозможи право, правда и казнивост на криминалот во нашата држава“, велат од Министерството за правда.

Според нив, очајничките обиди во Законот да се смести скриена амнестија, дополнително ќе придонесе за продолжување на кривичното гонење и финализирање на судските постапки против сегашни и поранешни функционери на политички партии.

„Шансите за договор зависат од тоа колку ВМРО- ДПМНЕ ќе се држи цврсто до насоките од нивниот менаџер од Будимпешта. Крајно време е Мицкоски да се преиспита што му е поважно: дали европската иднина на нашите граѓани или спасот на оној кој му ја менаџира партијата од Будимпешта“, велат од Министерството за правда.

Заев: Има напредок за СЈО

Премиерот Зоран Заев денеска на прашањето кога ќе продолжат разговорите за СЈО и дали има рок до кога ќе се чека поддршка од опозициската ВМРО-ДПМНЕ, Заев вели дека разговорите течат и има мал напредок.

„Ќе оставам за тоа да коментираат министерката за правда и претставниците на ВМРО-ДПМНЕ кои во моментот разговараат. Помалите опозициски партии како што е Алијансата за Албанците и Беса ги дадоа своите инструкции и дадоа простор да се постигне договор прво со најголемата опозициска партија. Осумте пратеници кои се во новата пратеничка група на ВМРО-ДПМНЕ и коалицијата исто така дадоа свои правци и инструкции но дадоа простор прво со најголемата опозициска партија. Верувам дека во многу брзо време тоа ќе вроди со плод, и верувам ќе се изнајдат начини тоа да се донесе навремено, за да биде составен дел на извештајот, што се објавува по завршување на изборите за ЕП, но се пишува во почетокот на мај“, изјави Заев.

Димитров на средба со министрите за надворешни работи на НАТО сојузниците

Mинистерот за надворешни работи Никола Димитров учествуваше на Состанокот на министрите за надворешни работи на НАТО. 

„За нас ова е посебен ден, бидејќи станува збор за прв состанок од ваков ранг, на кој, со подеднакво право на дискусија, учествува нашата држава“, изјави Димитров.

При отворањето на работната сесија, Генералниот Секретар на НАТО, Јенс Столтенберг, му посака топло добредојде на министерот Димитров и уште еднаш потенцираше дека очекува што е можно побрзо заокружување на ратификациониот процес во сите држави. Ни претставува особено признание и задоволство што сите министри упатија искрени честитки за „заслуженото столче” на масата на сојузниците.

Престојот во Вашингтон беше заокружен со средби со министрите за надворешни работи на Унгарија, Португалија и Полска. Покрај нашето интересирање за ратификацијата на Пристапниот Протокол за НАТО, предмет на разговор беше и поддршката од овие земји за почеток на преговори со ЕУ. Притоа, МНР на Унгарија ја потенцираше нивната јасна позиција за започнување на преговори со Република Северна Македонија без одлагање. Вакви заложби споделија и останатите двајца соговорници на МНР Димитров. Со делегацијата на Полска се разговараше и за можноста за соработка и помош во врска со користењето на ЕУ фондовите

Случај на политичка злоупотреба на децата 

Ниту овој изборен процес, за жал, не изостанува злоупотребата на децата во изборни и политички цели.

Фејсбук страницата Македонија, која има над 30.000 следбеници, покрај повици за бојкот на претстојните претседателски избори, содржини полни со говор на омраза и против Преспанскиот договор, објавува и фотографии од штотуку проодени деца во политички контекст.

Станува збор за фотографија, објавена на 1 април, која најверојатно би требало да претставува маска за денот на шегата, но објавена во овој контекст претставува злоупотреба на децата за политички цели. Дури и да постои согласност од родителот за објавување на фотографијата, ваквата постапка е крајно неприфатлива.

ЦИВИЛ: Стоп за политичка злоупотреба на децата! 

ЦИВИЛ – Центар за слобода најостро ја осудува злоупотребата на децата и малолетниците во политички и изборни цели. Врз основа на долгорочниот изборен мониторинг на ЦИВИЛ, се констатираат случаи на злоупотреба на деца и малолетници пред и по почетокот на кампањата за претседателските избори во Република Северна Македонија.

Политичката злоупотреба на децата е забранета со закон! Според член 12, став 4 од Законот за заштита на децата, се забранува злоупотреба на децата поради политичко или верско организирање и дејствување.

ЦИВИЛ ги потсетува политичките партии, родителите, медиумите и институциите дека секое дете, без никаков исклучок, има право на достоинствен живот и да ги ужива сите права наведени во Декларацијата за правата на децата и во Законот за заштита на децата. Голем број деца немаат пристап до квалитетно образование, здравствена заштита и достоинствени услови за живот.  Тие имаат право на безгрижно детство, ослободено од дневно политичките случувања.

Изборна хроника