Фокусот на темата на втората панел дискусија од Форумот „Две години Влада – Одговорно пред граѓаните“, беа приоритетите на Владата, за периодот 2019-2020 година. Модератор на панелот беше Џабир Дерала, претседателот на ЦИВИЛ, а на панелот учествуваа премиерот Заев, новинарот Томислам Кежаровски, универзитетската професорка Беса Арифи, граѓанската активистка и претседателка на НВО Амбрела, Љатифа Шиковска, и директорката на Хелсиншкиот комитет за човекови права, Уранија Пировска.
Премиерот Заев изјави дека многу работи се смениле во нашата земја и дека придобивките мораат да ги верификуваат граѓаните.
„Во многу земји се случувале тие придобивки, ќе се почувствуваат и кај нас. Постигнатите економски бројки сè уште граѓаните не ги чувствуваат непосредно, но сами по себе се надеж дека ќе се почувствуваат ефекти ако продолжиме по тој пат. Јас сум премиер кој сака да учи и да слуша. Ако заедно сработиме ќе ги максимизираме ефектите, убеден сум во тоа“, потенцираше премиерот Заев.
Професорката Беса Арифи даде свое видување за идните чекори и приоритети на Владата во следниот период и рече дека во Извештајот на Европската комисија е нотиран значителен напредок во рамки на реализацијата реформскиот процес, во сите области, а посебно во правосудството, разунавачките служби и во јавната администрација.
„Јас сум дел од Советот за следење на реформите во правосудниот систем можам да кажам дека со најголема посветеност се следени сите упатства од сите извештаи и на Прибе и на ЕК при носење на низа закони кои ни ја донесоа ова добра оценка во извештајот на ЕК. Владата, граѓаните, и академскиот сектор, беа партнери во носењето на овие закони. Како општество е важно да го видиме и она што не го пишува во извештајот“, додаде Арифи.
Уранија Пировска зборуваше за потребата од квалитетно спроведување на законските решенија, на реформата во јавната администрација и на враќање на довербата на граѓаните во инситутциите.
„Неспорно е дека оваа влада во изминативе 2 години помина низ крупни процеси за да се отвори патот кон ЕУ и НАТО. Ние како граѓански организации низ комуникација со граѓаните знаеме како функционира јавната администрација. Општа констатација приоритет мора да биде на оваа Влада да ја врати довербата на граѓаните во администрацијата. И мора имплеметацијата да биде висока за да можат граѓаните да почувствуваат ефекти од реформските закони“, рече Пировска.
Љатифа Шиковска зборуваше за очекувањата на ромската заедница од до сега сработеното, за Националата стартегија на Ромите и за новиот закон за социјална помош со кој зе зголемува помошта и опфатот на граѓани чии корисници во најголем дел се припадници на ромската заедница, за кој изрази очекување дека ефикасно ќе се имплементира.
Томислав Кежаровски зборуваше за важноста на слободата на говорот и изразување, потсети на времето кога овие основни човекови права беа загрозени во периодот на владеење на претходната власт, и нагласи дека овие вредности мора да останат во врвот на приоритетите на Владата.
„Правото на слобода на говор е едно од основните човекови права. Без слобода на говор нема слободни луѓе и слободни луѓе. Ова слобода е право на секоја демократија. Преку слободата на говорот може да корегираме она што го прави извршната власт. Новинарите треба да бидат надзор и контрола на власта. Важен е квалитетот и степенот на информирање на граѓаните“, истакна Кежаровски.
Форумот „Две години Влада – одговорно пред граѓаните“, се одржа денеска во во сала Милениум 1, во хотел Холидеј Ин во Скопје, на кој учествуваа премиерот, вицепремиерите, невладините, медиумите, бизнисот и академијата.
Поводот за одржување на овој форум беше одбележувањето на две години од формирањето на Владата на Република Северна Македонија.
Ангела Петровска
