Најчевска: Децата на функционерите се во старт привилегирани!

Речиси секој ден, ЦИВИЛ МЕДИА одбира по еден статус на ФБ или Твитер и го објавува во рубриката МРЕЖА. Проф. Мирјана Најчевска така ја „затресува“ МРЕЖАТА со своите опсервации и остри критики, што изборот многу често паѓа токму на нејзиниот профил, односно статуси на социјалните мрежи. И денеска, изборот падна токму на нејзиниот статус за непотизмот, а поврзан со изјавата на премиерот Зоран Заев кој настапи во Отвореното студио на МРТВ. Во врска со забелешките дека администрацијата е преобемна, премиерот рече дека од човечки аспект, никој не е подготвен, ниту сака да ги отпушти луѓето без претходно да им обезбеди иднина. Во однос, пак, на вработувањето деца на функционери не смее да има забелешки, ако постапката е регуларна. И ним треба да им се овозможи еднаква можност некаде да конкрурираат и да се вработат, но процесот и целата постапка мора да бидат транспарентни, јавноста да знае дека ги исполнуваат потребните критериуми и се ангажирани на соодветното работно место. Притоа, премиерот кажа дека децата на функционерите не треба да бидат третирани како да се од „втор ред“.

Проф. Мирјана Најчевска остро реагираше:

Ајде уште еднаш да повторам, па можеби ќе разберете. Децата на функционерите се во старт привилегирани. Треба да се избегнува вработување на деца на функционери во државна служба се додека е родителот на функција. Доколку се случи такво нешто, не е доволно детето на функционерот да ги исполнува условите на конкурсот. Треба:
1. Да се даде образложение за самиот конкурс (зошто е потребна бараната квалификација, и/или, зошто се отвора/пополнува баш тоа а не некое друго работно место);
2. Да се даде многу јасно образложение зошто е избран баш тој кандидат, а не некој друг;
3. Секоја постапка на жалба да се третира како постапка за дискриминација и да се префрли товарот на докажување на работодавачот.
Ве молам, не се измотавајте со нас затоа што веќе немаме живци да трпиме глупост од никаков вид.
А што се однесува до отпуштањата во администрацијата, уште на самиот почеток требаше да се преиспитаат сите незаконски вработувања, унапредувања и именувања. И да се почне од таму.
Отпуштањето на некој кој е неправно примен на работа не е прекршување на правото, меѓутоа ЗАДРЖУВАЊЕТО НА НЕКОГО КОЈ Е НЕПРАВНО ПРИМЕН НА РАБОТА Е ДЕЛУВАЊЕ СПРОТИВНО НА ПРАВОТО.
Не знам како појасно да го кажам ова.