Реакциите на адвокатите се спонтани и оправдани и се резултат на Предлог законот за нотаријат во кои се отстрануваат адвокатите, изјави за МИА претседателот на Адвокатската комора на Македонија, Никола Додевски во врска со најавите за штрајк.
Тој вели дека воопшто не би сакале да има потреба од штрајк.
– Адвокатската комора се обрати до Владата со барање да не се прифати овој Предлог, заради заштита на положбата на адвокатите и се надеваме на овој начин да се реши проблемот, истакнува Додевски.
На 28 февруари 2018 година претседателот на Адвокатската комора на РМ, Никола Додевски доставил допис до премиерот Зоран Заев, во кој е образложен процесот на измени и дополнувања на Законот за нотаријат, и во писмена форма се доставени сите предлози и забелешки на Адвокатската комора, како и целокупната коресподенција на Комората со Министерството за правда.
Со дописот, како што велат од Адвокатската комора, се бара средба на која, покрај опишаниот проблем би се разгледале и останатите проблеми со кои се соочува адвокатурата во Република Макеоднија.
Доколку Владата ги одобри законските измени со кои им се даваат поголеми права на нотарите, а се одземаат ингеренциите на адвокатите, тие најавија дека ќе почнат да штрајкуваат.
Законот за нотаријат беше донесен пред две години и вклучуваше задолжителното присуство на адвокат во определни постапки пред нотарот.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.