Целосната инвазија на руската федерација во Украина доведе до привремена окупација на речиси 20 отсто од територијата на Украина и непоправлива загуба меѓу цивилното население и воениот персонал и до хуманитарна криза од големи размери за целиот свет, сумираше денес украинската амбасадорка Лариса Дир на конференцијата посветена на војната во Украина, која се одржа во Скопје.
Зборувајќи за последиците таа посочи за тортура и убиства на украинско цивилно население и воен персонал на вооружените сили, киднапирање на украински деца и нивно насилно пренесување во Руската федерација.
„Русија извршува ракетни и беспилотни напади за да убива цивили и да ја уништи енергетската инфраструктура, која нема воена намена и насилно испраќа мобилизирани Украинци во воената зона и ги принудува да се борат против своите сограѓани. Гранатирањето од страна на руските сили уништи или оштети најмалку 270 верски објекти и уништени се 783 објекти од културно наследство“, рече амбасадорката.
Дир објави дека еколошката штета во Украина предизвикана од војната во Русија се проценува на повеќе од 27 милијарди евра.
Во продолжение таа се осврна и на нуклеарна уцена од страна на Руската федерација и последователни нелегални обиди за анексија на украински територии и незаконско присвојување на капацитети за нуклеарна енергија како и за миграциската криза во која околу 7,7 милиони бегалци кои бегаат од Украина се регистрирани низ Европа, додека околу 8 милиони луѓе се раселени во земјата.
„Разорните последици од руската војна против Украина може да се сфатат само со разбирање на генезата на криминалните дела на Русите. Русија намерно го избра патот на убивање Украинци и ликвидација на Украина како држава. Со други зборови, Русија го продолжува геноцидот врз Украинците“, рече амбасадорката.
„Има повеќе од доволно докази за геноцид, воени злосторства и злосторства против човештвото извршени од Руската федерација на територијата на Украина. Парламентите на голем број земји веќе усвоија одлука за осуда на злосторството геноцид во Украина извршено од Русија – тоа се Полска, Естонија, Латвија, Канада, Литванија, Словачка, Чешка, Ирска“, нагласи таа и повика парламентите на земјите да донесат соодветни одлуки во врска со осудата на геноцидот врз украинскиот народ.
„Ја повикуваме секоја држава да размисли за приклучување кон Специјалниот трибунал инициран од Украина за да го казни руското воено и политичко раководство за неговото злосторство на агресија“, порача Дир.
Таа апелираше на побрза испорака на оружје за Украина во кое ќе предничат ракетните и воздушните одбранбени системи „за да се избегнат повеќе жртви“.
Зборувајќи за НАТО аспирацијата на Украина амбасадорката Дир потсети дека нејзината земја на 30 септември потпиша апликација за забрзан пристап во НАТО, за што е потребен консензус од сите земји-членки. „Доколку Алијансата постави дополнителни мерки, кои Украина треба да ги преземе за успешно да го заврши процесот на пристапување во НАТО, Украина ќе ги исполни сите. Би сакале да побараме поддршка за овој процес“, рече таа.
На крајот амбасадорката се заблагодари на Северна Македонија, која како што истакна, ги поддржа сите пакети санкции, даде поддршка за сите резолуции кои се однесуваат на помошта на Украина во рамките на меѓународните организации, го поддржа форматот на Кримската платформа, учесник е на Парламентарниот самит на Кримската платформа, чија седница се одржа вчера, за обезбедување хуманитарна помош од првите денови на војната, како и суштинска воена помош.
Извор: НоваТВ
