„Сметам дека сите ние одговорни институции, граѓанскиот сектор и медиумите имаме обврска да им покажеме на укажувачите дека претставуваат една од клучните алатки за борба против сите форми на корупција и различните форми на злоупотреба од страна на високи функционери“, изјави Специјалната јавна обвинителка Катица Јанева, на настанот со кој се одбележа Меѓународниот ден на укажувачите и Денот на слободен говор во Македонија, во организација на Коалицијата за заштита на укажувачите во Југоисточна Европа (SECWP) и на Центарот за истражувачко новинарство СКУП – Македонија.„На овој начин ќе ги потикнеме граѓаните кои се свесни за злоупотребите и корупцијата, но се чувствуваат несигурни и загрижени за последиците и реперкусиите, со кои тие и нивните семејства можат да се соочат, ако проговорат“, изјави Јанева во своето обраќање на Меѓународниот ден на укажувачите.
Јанева додаде дека СЈО има одговорност да обезбеди доверба на граѓаните во институциите. Таа нагласи дека СЈО постојано укажува на потребата од имплементација на препораките на Венецијанската комисија, во однос на Законот за заштита на приватноста и Законот за заштита на укажувачите, заради проблемите на вработените со кои се соочуваат постојано, а токму поради недоследностите во наведените законски решенија.
„Морам да истакнам дека Специјалното јавно обвинителство кое го раководам повеќе од една година, го доживувам, преку нашите прес-конференции, како да сме ‘свиркачи’ и дека придонесуваме на некој начин кон подигање на свеста кај граѓаните“, истакна Јанева.
