Австралија вети дека ќе ја преземе „најсилната можна акција“ доколку Русија му наштети на еден од нејзините државјани заробени борејќи се за Украина, откако се појавија извештаи дека воениот заробеник можеби бил убиен.
Оскар Џенкинс беше заробен од руските сили минатиот месец, по што на руските профили на Телеграм се појави видео на кое се гледа како Џенкинс е земен како воен заробеник, кое Си-Ен-Ен не можеше да го геолоцира. На снимката, рацете на Џенкинс се цврсто врзани и се чини дека тој се бори да ги разбере прашањата поставени на руски јазик. Еден човек го удира двапати по глава.
Оваа недела австралискиот национален радиодифузер ABC и филијалата на CNN, Seven News, објавија дека 32-годишниот најверојатно е убиен, обајцата цитирајќи извори во Украина.
Говорејќи на прес-конференција во средата, австралискиот премиер Ентони Албанес рече дека неговата влада „бара итно разјаснување“ за ситуацијата, додавајќи дека е „сериозно загрижена“.
„Веќе го повикавме рускиот амбасадор“, рече тој.
„Ќе чекаме да излезат фактите. Но, ако на Оскар Џенкинс му е нанесена некаква штета, тоа е апсолутно за осуда. А австралиската влада ќе ја преземе најсилната можна акција“.
Тој одби да елаборира какви активности може да преземе Канбера.
Се верува дека најмалку седум Австралијци загинале борејќи се во Украина, според Еј-би-си, но се знаело дека никој не умрел додека бил заробен.
Подготви: Драган Мишев
