Поранешниот американски претседател Џо Бајден, во ексклузивно интервју за Би-Би-Си, негово прво откако ја напушти Белата куќа, истакна дека притисокот од администрацијата на Трамп врз Украина да отстапи територија на Русија е „модерно смирување“, и дека тоа само ќе го охрабри Путин и ќе ја загрози глобалната безбедност.
Бајден, кршејќи ја традицијата на поранешните претседатели кои избегнуваат критики кон наследниците на почетокот на нивниот мандат, рече дека отстапувањето на украинската територија би можело да ја поткопа довербата во глобалната улога на Вашингтон.
Неговите коментари доаѓаат откако најновиот мировен предлог на администрацијата на американскиот претседател Доналд Трамп наводно вклучувал признавање на контролата на Русија врз Крим од страна на САД и де факто признавање на другите окупирани украински територии.
На 25 април, Трамп го повтори своето тврдење дека амбициите на Украина кон НАТО ја предизвикале целосната инвазија на Русија, додавајќи дека Крим „ќе остане со Русија“.
„Секој што мисли дека тој (Путин) ќе застане ако некоја територија биде отстапена како дел од мировниот договор е едноставно глупав“, рече Бајден, без експлицитно да го именува Трамп во текот на интервјуто.
„Едноставно не разбирам како луѓето мислат дека ако дозволиме на диктатор (Путин), насилник, да одлучи дека ќе земе значителни делови од земјата што не е негова, тоа ќе го задоволи. Не разбирам сосема.“
На прашањето дали неговата администрација направила доволно за да ѝ помогне на Украина да ја добие војната, Бајден рече:
„Им дадовме сè што им беше потребно за да ја обезбедат својата независност и бевме подготвени да одговориме, поагресивно, ако Путин повторно дејствува.“
Бајден, кој зборуваше додека сојузничките земји ја одбележуваат 80-годишнината од Денот на победата оваа недела, рече дека е загрижен за прекинот на односите меѓу САД и Европа под претседателот Доналд Трамп, што, според него, „ќе ја промени модерната историја на светот“.
Запрашан за третманот на сегашната администрација кон сојузниците на САД, поранешниот претседател ги осуди повиците на Трамп САД да го вратат Панамскиот канал, да го стекнат Гренланд и да ја направат Канада 51-ва држава.
„Што се случува овде? Кој претседател некогаш зборува така? Тоа не сме ние“, рече тој. „Ние сме за слобода, демократија, можности, а не за конфискација“.
Д. Мишев
