Само ранливите категории потрошувачи да добијат поддршка за заштита од енергетска сиромаштија за да се намали ударот од последното зголемување на цената на електричната енергија. Оние што немаат проблем со плаќање на сметките не треба да добијат поволности, а да се најдат категориите ранливи во кои би биле вклучени социјалните случаи и граѓани погодени од ковид-кризата.
Ова го порача претседателот на Регулаторната комисија за енергетика и водни услуги (РКЕ) Марко Бислимоски, денеска во одговор на новинарско прашање. Тој најави дека веќе се започнати преговори со синдикатите и невладиниот сектор што ги организира протестите против поскапување на цената на електричната енергија, и дека следниот состанок ќе се одржи наредната недела во проширен состав со вклучување на повеќе претставници од штрајкувачите.
-Вчера одржавме состанок со претставници на синдикати и ние како РКЕ се договоривме да им дадеме целосна логистичка поддршка во натамошни разговори кои би ги правеле со Владата во однос на зголемување на бројот на ранливи категории потрошувачи кои би можеле да користат дополнителни средства за заштита од енергетска сироматштија. Во текот на наредна недела ќе одржиме уште еден состанок на кој ќе бидат поканети и претставници од НВО кои пртоестираат, на кој уште еднаш ќе ги презентираме нашите видувања како овој удар од зголемувањето на цената на електрична енергија би бил што е можно помал врз граѓаните. При тоа, ние сме на став дека треба да се зголеми бројот на ранливи категории потрошувачи што треба да добиваат соодветна помош за заштита од енергетска сиромаштија, рече Бислимоски.
Вообичаено, додаде, тоа би биле социјалните случаи, но исто така и граѓаните кои имаат проблеми заради постојната ковид криза.
-Инсистираме тоа да се однесува исклучиво на потрошувачи што имаат проблеми, а за оние што немаат реално проблеми сметаме дека нема потреба да се обезбедува дополнителна помош за заштита од енергетска сиромаштија, истакна Бислимоски.
Според него, намалување на ДДВ не е опција бидејќи, како што рече, на тој начин би добиле сите категории потрошувачи, а не само ранливите категории потрошувачи.
-На тој начин би добиле и богатите кои реално немаат никакви проблеми за плаќње на сметките за електрична енергија. Имаме протести на кои се присутни и граѓани кои имаат екстремно скапи автомобили и сметам дека овие категории не би требало да добијат никакви поволности, рече Бислимоски.
Прецизира дека во наредниот период ќе разговараат и со претставници на Владата за намалување на ДДВ-то за струјата, но претходно, како што кажа ќе ги дорасчистат некои прашања со синдикатите и невладините организации кои се излезени на протести.
-Го оставаме нивното право на протест, но веруваме дека ќе најдеме заеднички прифатливо решение за најранливите категории потрошувачи, рече Бислимоски и додаде дека на наредниот состанок ќе присуствуваат претставници на сите невладини организации што ги организираат протестите.
Информира дека за професионалната работа добиле поддршка и потврда за стручноста на годишното собрание на Регионалната асоцијација на регулаторни комисии за енергетика и на состанокот на Бордот на регулаторни тела на Енергетската заедница.
