„Јас сум авторот на тие две песни, како и на други песни што не се објавени во јавноста. Бев во можност да учествувам на тој конкурс под туѓо име, затоа што го исполнував само едниот услов, а тоа беше да немам објавено своја збирка поезија. Вториот услов беше да биде млад човек до 29 години и затоа песните ги пуштив на име на мој пријател кој за тоа беше консултиран“, вели Александар Блажевски за ЦИВИЛ Медиа, кој се произнесе како автор на двете спорни песни објавени во стихозбирката „Млади поети“, на кои како автор е потпишано друго лице.
Според информации со кои располага ЦИВИЛ Медиа, Блажевски работи како волонтер во Општина Ресен, а претходно бил професор по математика во ОУ „Гоце Делчев“, Ресен. Неговата работа во училиштето прекинува поради проблем во комуникацијата со децата.
„Дефинитивно не ги сметам за скандалозни моите песни. Ги сметам за нешто најнормално нешто што треба да се каже во јавноста и да посочи на општествени проблеми, дека не се работи за мртва уметност, литература, неважни проблеми, туку за проблеми што се во фокусот на едно комплицирано општество какво што е нашето мултиетничко македонско општество“, ни рече Блажевски, одговарајќи на прашањето дали смета дека скандалот е оправдан и која е всушност порака што сакал да ја пренесе.
Блажевски не чувствува одговорност и смета дека единствениот проблем лежи во државните пари потрошени за издавањето на оваа збирка поезија.
„Говор на омраза дефинитивно нема во моите песни. За тоа се консултирани правници што имаат докторат на науки. Јас не чувствувам никаква одговорност, затоа што јас песните секако ќе ги објавев под свое име. Во таа Агенција за млади и спорт можеа само да ги цензурираат и да ги тргнат. Мене никој не може лично да ми забрани на мој трошок да ги објавувам. Фокусот на тие што се бунеа не беше за содржината, туку зошто било со државни пари финансирано, а не била објавена како приватна стихозбирка која би била игнорирана“, изјави Блажевски.
Според разговорот со Блажевски, може да се заклучи дека тој не чувствува никаква одговорност по прашањето за говорот на омраза и за импликациите што произлегуваат од неговото јавно признавање како автор на песните.
„Идејата беше да се најдат мои песни во таква збирка што би ја читала публиката од Македонија. Јас прифаќам одговорност, меѓутоа нема според кој закон и кој член од законот да прифатам одговорност, затоа што го разгледував законот за навреда и клевета во кој, според член 7 тие кривични дела не се однесуваат на уметничко творештво, туку на некоја поексплицитна навреда кон некое конкретно лице искажана во јавноста“, рече Блажевски, по што одеднаш го прекина разговорот.
Биљана Јордановска