Независна Украина ќе постои многу подолго отколку Владимир Путин, изјави синоќа во интервју за Си-Ен-Ен американскиот државен секретар Ентони Блинкен, пренесува МИА.
-Вака или онака Украина ќе остане, а Путин еднаш ќе го снема, изјави Блинкен.
Во интервјуто, државниот секретар го повика рускиот претседател да запре со војната.
-Запрете ја војната веднаш, повика тој.
Тој уште еднаш ја предупреди Кина за тешки последици ако одбере да помага на Москва во избегнување на санкциите.
-Фактот дека Кина не го осуди она што Русија го прави, самото тоа зборува многу, изјави Блинкен
Американскиот државен секретар Ентони Блинкен во вторникот разговараше со украинскиот министер за надворешни работи Дмитриј Кулеба за безбедносните потреби на Украина во конфликтот со Русија, соопшти американскиот Стејт департмент.
Во соопштението се наведува дека Кулеба и Блинкен изразиле загриженост поради убивањето и ранувањето цивили, како и за оштетувањето на цивилната инфраструктура и станбените објекти.
„Блинкен и Кулеба разговараа и за дипломатските напори што во моментов се прават за да се запре војната што започна со руската инвазија во Украина, соопшти Стејт департментот.
САД денеска ставија на црната листа руски воени лидери и други руски функционери, обвинувајќи ги за кршење на човековите права, а беа воведени и нови санкции за белорускиот претседател Александар Лукашенко.
По разговорите со Блинкен, Кулеба на Твитер напиша дека го поздравува новиот пакет лични санкции против руските претставници, но додаде дека е потребно „да се зголеми економскиот притисок врз Русија“.
Тој во изјавата нагласи дека се согласува со американскиот државен секретар дека од најголема важност е да се обезбеди безбедност на нуклеарните постројки во Украина.
