Началникот на Главната разузнавачка управа на Министерството за одбрана на Украина, Кирило Буданов, изјави дека сегашното воено-политичко раководство на Русија систематски се подготвувало за геноцид врз Украинците долго пред почетокот на инвазијата во целосни размери, објави на својата Фејсбук страница Главната управа за разузнавање (ХУР), пренесува Укринформ.
Буданов објасни дека подготовките за геноцид на украинскиот народ пред инвазијата вклучувале создавање списоци за егзекуција, мобилни крематориуми и планови за масовни погребувања.
Говорејќи на форумот „Геноцидните практики на Русија во Украина: Од холодомор до руско-украинската војна“, Буданов истакна дека во написот на рускиот диктатор Владимир Путин, објавен во јули 2021 година, лидерот на Кремљ уште еднаш го негираше право на постоење на Украинците.
„Руската пропаганда, нејзиното раководство, највисоките функционери и целиот државен апарат, благословен од нивниот лидер, постојано повикуваа на уништување на Украинците“, потсети Буданов.
Шефот на украинското одбранбено разузнавање нагласи дека раширената украинофобија навлезе во сите нивоа на руското општество.
„Геноцидот врз Украинците не е само државна политика на Русија, туку и задолжително општествено верување наметнато одозгора“, рече Буданов.
Пред целосната инвазија на Украина, руските агресори добија инструкции за поставување масовни гробници, истакна тој.
„На списоците за егзекуција требаше да бидат вклучени украински наставници по јазик, литература и историја; АТО ветерани; новинари; научници; писатели; свештенството на Православната црква на Украина и другите деноминации кои ја поддржуваат Украина; јавни и политички личности; и шефови на влади и локални власти“, рече Буданов.
Тој додаде дека овие манијакални инструкции и директиви биле систематски имплементирани во различни региони на Украина нападнати од руските сили.
„Бевме сведоци на ужасни масовни злосторства врз украински граѓани, чии размери станаа познати ширум светот. Злосторствата извршени од единиците на руските вооружени сили во Бородинка, Буча, Хостомел, Изиум, Мариупол и многу други украински населби покажаа дека овие координирани и систематски дејствија се засноваат на јасни доктринарни принципи на руската геноцидна политика и нејзиното воено раководство“, нагласи Буданов. .
Предходно, форумот „Геноцидните практики на Русија во Украина: од холодомор до руско-украинската војна“ се одржа на 22 ноември 2024 година. На форумот присуствуваа истражувачи на Холодомор, историчари, претставници на јавноста и меѓународни гости.
Подготви: Драган Мишев
