„Знаете ли колку е тешко партијата ВМРО-ДПМНЕ да зависи од волјата на еден човек?“, истакна Петар Богојески, еден од претставниците на Реформаторите во ВМРО-ДПМНЕ, на денешната трибина „Без табу теми!“, која се одржа во Клубот на новинари во Скопје, во организиција на ЦИВИЛ-Центар за слобода.
Во изминатиот период, ЦИВИЛ организираше неколку јавни трибини и дебати со претставници од речиси сите политички партии во Македонија, меѓутоа, тогашните партнери во владеачката коалиција ВМРО-ДПМНЕ и ДУИ редовно го избегнуваа соочувањето со јавноста и давањето отчет за своите штетни политики. Немаше ни одговори на поканите. За првпат, претставници од ВМРО-ДПМНЕ прифатија да учествуваат на јавна трибина и да одговараат на прашања! ЦИВИЛ ја поздравува храбрата одлука на реформаторите на ВМРО-ДПМНЕ да проговорат за состојбите во партијата и да се соочат со прашањата на новинарите и на граѓан(к)ите.
Откако подолго од деценија, ВМРО-ДПМНЕ ја создаваше виртуелната реалност преку скапите медиумски кампањи, обидувајќи се да ја инсталира розовата партиска слика како реалност, ЦИВИЛ ги повика реформаторите на ВМРО-ДПМНЕ да одговорат на бројните прашања што се отворија овие денови, по нивните први јавни настапи: што навистина се случувало и сè уште се случува во ВМРО-ДПМНЕ? Со што се соочуваат реформаторите кои се охрабрија да проговорат? За какво ВМРО-ДПМНЕ се залагаат и колкава поддршка имаат меѓу членството и особено меѓу пратениците?
Претставниците на Реформаторите, Александар Михајлоски, Илија Илијоски, Александар Коневски и Петар Богојески, се извинија за говорот на омраза насочен кон етничките заедници во постизборниот процес, ги осудија насилствата на 27 април во Собранието, најавија нов курс во партијата, со кој ВМРО-ДПМНЕ ќе има многу повеќе албански гласови од СДСМ, откако ќе се отворат партиските тела за влез на сите етнички заедници, но и информираа за закани и притисок врз членови на партијата коишто ги поддржале внатрепартиските реформи.
„Ние не смееме во иднина да дозволиме само политичарите да имаат контрола. Ако ВМРО-ДПМНЕ не одговори на нашето барање, ние имаме решение. Сакаме што помалку негативна слика и шизма да се фрли во јавноста. Но, ако имаме негирање од другата страна, ќе ја омасовиме поддршката на терен, по што ќе стане нужно да се разговара. Убедени сме дека реформите набрзо ќе се случат, отпор имаме само од структури кои биле поставени во штабовите во изминатите пет-шест години и се плашат да не бидат сменети“, рече еден од учесниците на трибината, Александар Михајлоски.
Според него, има три периоди во однос на демократијата во ВМРО-ДПМНЕ и државата. „Едниот е од 2006 до 2008 година, другиот период е од 2008 до 2011, и третиот по 2011 година. Кога ВМРО-ДПМНЕ дојде на власт во 2006 година, имаше многу поголема демократија, имаше слободни медиуми, институциите сè уште беа слободни… По 2008 година, се задушуваше слободата на медиумите. За мене, затворањето на ‘А1’ беше чекор кој му нанесе штета на ВМРО-ДПМНЕ и остави лош впечаток кај јавноста. По 2011 година, и институциите почнаа да се преземаат од ВМРО-ДПМНЕ. Ние не смееме во иднина да дозволиме само политичарите да имаат контрола“, рече Михајлоски.
Според него, „27 април“ не требаше да се случи, но треба да се најде начин да им се прости на оние кои биле поттикнувани да влезат во Собранието. „Огромен број од тие луѓе беа понесени со хушкачка реторика за да се случи тој настан. Во тие моменти, беше наведен народот да влезе во Собранието, за отпосле раководството на партијата да се огради од тие луѓе и да ги нарече насилници. Освен за тие што беа со маски, за многумина од нив, кои се чесни, треба да се најде начин да им се прости и да не се собира негативна енергија во иднината“, смета Михајлоски.
Според донеодамнешниот претседател на Општински комитет на ВМРО-ДПМНЕ – Центар, кој до 9 јуни бил разрешен без никакво образложение, во партијата не постои внатрешна демократија и критичка дискусија. „Дури по три дена ми беше соопштено дека сум разрешен од функцијата претседател на ОК ‘Центар’, а во секој момент, во претходните 9 месеци, мојата главна цел беше да се развие дискусија и да добиеме добри резултати на локално ниво“.
Според Петар Богојески, мора да се надминува еднонационалниот концепт и поделбите на патриоти и предавници.
„Сакам да бидам похрабар и да се извинам за навредите на неодговорни поединци на првите денови на протестите на ‘Заедничка Македонија’, каде без извикувани пароли со негативна конотација. Тие направија далекусежни негативни последици за ВМРО-ДПМНЕ. За мене, патриотизам не е извикување на такви пароли, туку изградба на силна држава и на силни институции. Ние имаме намера да го надминеме еднонационалниот концепт и мислам дека тоа табу, за кратко време ќе го смениме со искрена и чесна поставеност кон тие прашања. Ние инсистираме на нашите изворни вредности. ВМРО-ДПМНЕ, како конзервативна партија, ќе има многу повеќе албански гласови од СДСМ, откако, по реформите ќе ги отвориме телата на партијата за влез на сите етнички заедници“, рече Богојески.
Реформаторите истакнаа дека мора да се смени односот кон етничките прашања, дека се покажало оти 26 години без успех се инвестирало во етничките албански партии, и дека треба наместо тоа треба да се инвестира во сите граѓани, и во Албанците, и во Турците, Србите, Ромите… Најавија нов бран на космополитизам и беа децидни дека со навредите и заканите како „гасни комори“, мора да се престане и судски да се одговара за секаков говор на омраза.
На прашањето дали имаат право на користење на логото на ВМРО-ДПМНЕ, реформаторите беа едногласни дека „имаме дозвола за користење на партиското лого од 1991 година!
„Со сета наша борба и придонес за партијата и за Македонија, го имаме стекнато тоа право. Со гордоста кога партијата правела добро, и со срамот што го чувствувавме поради нејзините погрешни чекори… На логото нема право само еден човек!“, истакна Александар Коневски.
Со трибината на која присуствуваа претставници на медиумите и на граѓански организации, како и заинтересирани граѓанки и граѓани, и која предизвика голем интерес на социјалните мрежи за време на обезбедениот стриминг, ЦИВИЛ даде свој придонес кон развојот на политичката култура и кон обновувањето на дијалогот во општеството.
Д. Муратов
