Од денеска имаме нов претседател на државата и на нацијата. Не знам како се честита за претседател, дали му се честита на претседателот што станал претседател, или да ни честитам нам, граѓаните на Република Северна Македонија. Сеедно, честитки, до претседателот Стево Пендаровски, и до сите граѓани во земјата.
Што се очекува од новиот претседател на државата? Не во смисла на неговите ингеренции и должности што му припаѓаат со новата позиција на врвот на државата, туку во смисла на тоа што ќе треба да направи за граѓаните конечно, по 15 години да ја доживуваат институцијата „Претседател“ како покровител и заштитник на сите граѓани во земјава. Нешто што по претседателствувањето на Борис Трајковски, се претвори во применета институција, за лични амбиции, како што беше во случајот на Бранко Црвенковски, кого „буба не го лазеше“ за ништо друго освен што уживаше во своето кариерно достигнување додека го „одработи“ својот мандат, и следните десет години таа институција да биде огниште на еден човек востоличен и управуван од партија. За Ѓорге Иванов ми е зборот, којшто за тие десет години успеа да ја руинира и да ја претвори во една срамно, неетичко, горчливо, напати смешно, неспретно и гротескно претставување на цела нација во и вон земјата. Но, за него е веќе доста кажано, дури и премногу. Од денеска се очекува промена во таа смисла, и во многу други.
Господинот Пендаровски звучи добро, умерено, и свесно, кога зборува за своите цели во неговото ново патешествие наречено претседателствување со државата. Толку добро звучи, што ти е криво што нема можности да се изгласа два пати одеднаш. Секако, за тие што можеа да гласаат, бидејќи истата Државна Изборна Комисија што му го даде вчера уверението дека е изгласан за претседател на државата, не успеа да го среди Избирачкиот список, и да ни овозможи на сите граѓани да гласаме. Можеби претседателот Пендаровски ќе имаше уште повеќе гласови уште во првиот круг на гласање. А можеби и не. Којзнае… со ваков избирачки список и Изборен законик, ќе биде вака. Никогаш нема да се знае точно.
Од досегашните пораки и говори на новиот претседател, јас само можам да ги поздравам неговата одлучност (за сега декларативна) и решеност да работи како што треба. Имаше доволно време, и имаше од кого да учи како не треба, а за да правиш како треба, најдобро се учи како не треба. Би било добро кога не би ги спомнувал толку често и другите етнички заедници во РСМ, како предмет на неговата понатамошна заложба за опфатност, бидејќи со тоа се става во ист ранг со политичарите што ги употребуваат тие други етнички заедници за дневнополитички цели и (за жал) се уште добитни поени кај поединци. Доколку се задржи на своите планови, и не дозволи партијата да го стави под свое, и да игра како му свират, ќе биде доволно. Мислам дека е доволно свесен дека, колку и да е сведена на симболика и почесна титула, институцијата Претседател, сепак, има каде и кога можа да придонесе, секако позитивно и исправно, со свои непристрасни ставови и одлуки, внатре во земјата, а уште повеќе вон неа.
Како граѓанка на Република Северна Македонија, овој пат сакав да можам да гласам, но тоа не беше можно, заради мојот се уште несреден статус на место на живеење во личните исправи, овој пат. Сакав да можам да гласам, иако не бев сигурна дали ќе заокружев некој од кандидатите или ќе дадев мој предлог за некој непостоечки кандидат на листата. Сакав да можам да гласам. Вака, по не знам кој пат, мене, како граѓанка на РСМ, во собрание ме претставуваат луѓе што немав можност да ги гласам или да не ги гласам, да ми биде премиер личност којашто немав можност да ја гласам или да не ја гласам, и сега, да ми биде претседател личност којашто немав можност да ја гласам или да не ја гласам. И на тој Претседател, јас денеска му честитам што ќе ми биде, и што ќе ни биде претседател во следните пет години.
Господине Претседател, ако сакате да бидете вистински „татко“ на нацијата, пред се, бидете ни достапен, услужлив, со начулени уши, залагајте се за сите еднакво, а највеќе за тие што не можеа да гласаат, бидејќи ние ќе ве плаќаме, како што е законот, до крајот на вашиот живот.
Да ни поживеете долго, и да не служите како ние вас.
Честитки, и аирлија работа, Претседателе!
[divide]
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста.
Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
