Проф. д-р Катерина Колозова ја потсети Владата дека, по ребалансот на буџетот, се забележува дека политиката останува фокусирана на „вокациското образование“, што го преведува како „производство на молери и ѕидари за извоз во ЕУ“. Колозова ја повикува Владата да гради „вистинска економија базирана на иновација, која е неможна без директната врска со наука“.
Д-р Колозова на Владата повторно ѝ го предочува документот „Предлог политики за поттикнување на научниот развој и академското самоусовршување“ кој ѝ бил доставен во 2017 година, на самиот почеток на мандатот.
„Во годината кога иновациите и знаењето се прогласени за економски и развоен приоритет на Македонија според ИПА2, Македонија е сѐ уште фиксирана на средно стручно образование или т.н. vocational training. Освен како резервоар на евтина работна сила, Македонија треба и може да биде економија базирана на научни откритија од сите области, а хуманистиката и општествените науки да се врзат тесно со технолошките иновации како и со применетите знаења на студиите на политики. За вакво нешто да се случи, Македонија мора да се вложи забрзано во градење на основните вештини и способности на локалниот истражувачки кадар. Но, исто така, таа мора да вложи во негова интернационализација: способност да се учествува на меѓународни настани на рамна нога, барем во техничките компетенции, но и можноста да се биде во контекст на најнапредните меѓународни научни дебати. За ова да се случи, Македонија треба да се претвори во европски меѓународен hub (барем на Југоисточна Европа) на смели научни експерименти. Со самото ова, не само што ќе се произведува знаење за економијата туку самото производство на знаење ќе стане форма на економија (науката и високото образование како „креативна индустрија“).“ – вели д-р Колозова и додава дека ова треба да биде насока за размислување кога ќе се креира државниот буџет за идната, 2020 година.
Џ. Д.
ПРЕДЛОГ ПОЛИТИКИ ЗА ПОТТИКНУВАЊЕ НА НАУЧНИОТ РАЗВОЈ И АКАДЕМСКОТО САМОУСОВРШУВАЊЕ
