Во очекување на потенцијална војна со Русија, пристаништето Ротердам во Холандија почна да резервира простор за бродови на НАТО што носат воен товар и ги мапира логистичките рути за трансфер на оружје, објави „Фајненшл тајмс“.
Одлуката доаѓа во време кога сојузниците на НАТО сè повеќе предупредуваат на ризикот од војна од големи размери со Русија во рок од пет години. Ротердам претходно се справуваше со пратки на оружје, но ова е прв пат да се одреди посебно пристаниште за воена употреба.
Дел од контејнерскиот терминал ќе биде пренаменет за да се обезбеди безбеден трансфер на муниција и друга опрема помеѓу бродовите. Логистиката за воено снабдување ќе биде координирана со пристаништето Антверпен во соседна Белгија.
„Се гледаме се помалку како конкуренти“, рече Будевијн Симонс, главен извршен директор на Управата на пристаништето Ротердам, осврнувајќи се на пристаништето Антверпен.
„Доколку треба да се испорачуваат големи количини воена стока, ќе се свртиме кон Антверпен или други пристаништа за да преземеме дел од капацитетот и обратно.“
Симонс додава дека не сите терминали се опремени за ракување со товар од воено ниво, што ја прави логистичката координација клучна, особено за пратките од САД, Велика Британија и Канада.
Во мај, холандското Министерство за одбрана потврди дека ќе биде доделен простор за воени резерви на барање на НАТО. Овој потег е дел од пошироките напори на европските сојузници да ја намалат зависноста од САД за одбранбена логистика.
Воените трошоци на Русија се зголемија поради нејзината целосна инвазија на Украина. Според Меѓународниот институт за стратешки студии, буџетот за одбрана на Москва за 2024 година се зголемил за 42% во реални услови, достигнувајќи 462 милијарди долари, надминувајќи го вкупниот износ на сите европски земји.
Генералниот секретар на НАТО, Марк Руте, на 5 јули изјави дека кинескиот воен потег против Тајван би можел да го натера Пекинг да ја охрабри Русија да отвори втор фронт против земјите-членки на НАТО.
Руте постојано предупредува дека Русија би можела да ги обнови своите воени капацитети доволно брзо за да претставува директна закана за територијата на НАТО, повикувајќи ги сојузничките влади да дејствуваат брзо и решително.
Д. Мишев
