Лицата со попречености да бидат дел од структурите за донесување на одлуките, да бидат директори, раководителки, раководители, пратенички и пратеници, членови на Влада, членови на парламент. Да се крене рампата и да им се дадат еднакви можности во ова општество кое долго време гледаме дека се залага за изградба на едно општество за сите, побара денеска Џабир Дерала претседател на ЦИВИЛ на панелот под наслов „Рампа“, посветен на (не)прифатеноста на лицата со посебни потреби во општеството што се одржа во Скопје.
Дерала на денешниот панел по повод Меѓународниот ден на лицата со попреченост апелираше до политичките партии да одвојат дел од своите агенди и да поразговараат за тоа лицата со попречености да станат дел од нивните кандидатски листи.
Градоначалникот на Град Скопје, Петре Шилегов рече дека Градот изминатиов период бил многу активен во полето на социјалната заштита.
– Во рамките на редовните активности продолживме и ја унапредивме долгогодишната поддршка на Дневните центри кои работат со различна категорија на лица со попреченост како што се „Во мојот свет“, „Креатива Исток“, „Порака“ и уште неколку други. Продолживме и со бесплатниот јавен градски превоз и паркинг услуги за лица со попречености, како и со финансиската поддршка на патувања низ земјата за здруженија на лица со попречености, рече Шилегов.
Градот Скопје, како што посочи тој, за првпат ангажирал образовни асистенти за средношколците со посебни образовни потреби, како и обезбедил стипендии за средношколците со попречености. Речиси во сите средни училишта каде што имало можност обележале паркинг за лицата со попреченост. На лицата со аутистичен спектар на однесување им овозможиле бесплатно користење на јавниот градски превоз.
– Градот Скопје се приклучи на активностите на Министерството за труд и социјална политика во процесот на деинституционализација. Во таа насока го поддржува малиот групен дом во Скопје во кој се сместени лица од Заводот во Демир Капија. Преку Сојузот на специјални едукатори и рехабилитатори обезбедува 24-часовна грижа од негуватели за лицата сместени во домот. Обезбеди и помош и нега во домашни услови за лица со најтежок облик на интелектуална попреченост и комбинирани пречки од стручен тим составен од лекар специјалист по семејна медицина, медицинска сестра, физиотерапевт, социјален работник, психолог, дефектолог и негуватели, рече Шилегов.
Тој додаде дека во соработка со Црвениот Крст на Град Скопје оваа година ангажирале 12 помагатели да работат со 25 корисници од Скопје давајќи им ја негата и грижата која им е потребна. Финансиски го поддржале отворањето на Дневниот центар за Даунов синдром и обезбедиле персонални асистенти кои работат со корисниците во домот.
– Во завршна фаза од изработка е и инклузивно игралиште во Бутел, кое треба да биде завршено овие денови, а паралелно се работи на инклузивно игралиште и во Карпош. Во завршна фаза на административните процедури е и проектот за отворање сензорна соба во градинката „11 Октомври“ во Радишани, рече Шилегов.
На панел дискусијата учествуваа и Душан Томшиќ и Вангел Тркаљанов од Министерството за труд и социјална политика, Благица Димитровска од Здружение за промоција и развој на инклузивно општество „Инклузива“ од Куманово и Сандра Пешевска Мицковска, активистка за правата на лицата со попречености.
извор: МИА
