Почнува втората недела од изборната кампања за Локалните избори. Кандидатите за градоначалници и советници, заедно со нивните лидери се растрчани по трибини и митинзи каде продолжуваат да ги претставуваат своите програми, концепти и визии. Откажувања од соочување со противникот на ТВ дебати, ДИК почна да ги полни терминалите со податоци за граѓаните.
ДИК
Нова пратка терминали за отпечатоци пристигна во ДИК, почна полнењето со податоци од гласачите. До крајот на неделата треба да пристигнат договорените 4000 терминали за отпечатоци од прсти што првпат ќе се користат на Локалните избори 2021 година на 17 октомври. Државната изборна комисија денеска прими уште повеќе од илјада од овие терминали, а веќе е започнато и полнењето со податоци од граѓаните на веќе пристигнатите, изјави денеска претседателот на ДИК, Александар Даштевски, кој присуствуваше на примопредавањето.
ТВ ДЕБАТИ
Данела Арсовска, кандидатката за градоначалник на Град Скопје, поддржана од ВМРО-ДПМНЕ, одби да присуствува на дебата на Макфакс и А1он со другите кандидати за градоначалник на Град Скопје.
И кандидатот на Левица, Петар Георгиевски Камиказа иако првично ја прифатил, потоа ја одбил поканата за соочување со другите кандидати за градоначалник на Скопје.
Претходно и Борче Јовчески кандидатот за градоначалник на Прилеп од ВМРО-ДПМНЕ, со соопштение до медиумите ги откажа сите ТВ дебати со противкандидатите, иако како што вели добил повеќе покани од медиуми од Скопје.
ГРАД СКОПЈЕ
Градоначалникот на Скопје, Петре Шилегов на денешната прес-конференција ги презентираше главните придобивки од проектот паметен град – „Скопје Смарт сити“ на кој Град Скопје работеше заедно со Телеком во изминатите 6 месеци.Шилегов укажа дека „она што некои го зборуваат, град Скопје веќе го има имплементирано и го завршува“, и им порача на скопјани да ја побараат апликацијата „My Skopje“ – „Моето Скопје“, која е веќе достапна за корисниците на андроид на Google Store, а наскоро ќе биде достапна и за корисниците на уреди „Епл“.
Независната кандидатка за градоначалник на град Скопје, поддржана од ВМРО ДПМНЕ, Данела Арсовска денеска беше на средба со Сојузот на организации на жени на Македонија (СОЖМ) на која со претседателката на организацијата, Савка Тодоровска разговараа за правата и еднаквоста на жените во сите општествени сфери.
АКТИВНОСТИ НА ПОЛИТИЧКИТЕ ПАРТИИ
ШАНСА ЗА ЦЕНТАР
Во Градски парк, Шанса за Центар и Група избирачи со носителката на листа Јана Белчева-Андреевска во погон со ножички, лепак и тетрапак во ПР кампања.
СДСМ
Изградба на повеќе паркови за миленици, поставување на наменски корпи за отпад, едукации за одговорно сопствеништво, бесплатно микрочипирање, вакцинација и стерилизација. Ова се дел од барањата кои сопствениците на миленици од Аеродром му ги пренесоа на Александар Филиповски, кандидат за градоначалник за оваа општина на СДСМ и коалицијата.
Современа инфраструктура во секојa општина, град и село, Горан Герасимовски кандидатот за градоначалник на Центар од СДСМ и Коалицијата зборуваше за инфраструктурните проекти на СДСМ во денешната изјава за јавност.
Кандидатот за градоначалник на Кисела Вода од СДСМ, кој е и актуелен градоначалник на општината Филип Темелковски ветува нов инвестициски циклус во општината и развој на бизнисите.
ВМРО-ДПМНЕ
Изградба на нови, но и реконструкција на старите спортски и детски игралишта во скопската населба Јане Сандански е еден од приоритетите во програмата на Тимчо Муцунски, кандидат за градоначалник на Аеродром од редовите на ВМРО-ДПМНЕ.
Кандидатот за градоначалник на Кавадарци на ВМРО-ДПМНЕ и коалицијата Митко Јанчев денеска информира дека отворање нов граничен премин Мајден-Пуљевац со Република Грција е еден од проектите од неговата изборна програма.
Кандидатката за градоначалник на Град Скопје, Данела Арсовска денеска изјави дека доколку биде избрана, ќе депонира изјава до Антикорупциската комисија дека нема да има промена на нејзината имотна состојба и на нејзиното семејство во сите четири години од мандатот.
ДУИ
Градоначалникот на Чаир, и кандидат на ДУИ за следните четири години на оваа позиција, Висар Ганиу денеска во Старата скопска чаршија се сретна со млади луѓе од оваа општина, каде ги информираше дека Општина Чаир ќе обезбеди 400 квадратни метри простории, канцеларии опремени за развој на почетни бизниси и нови идеи за развој.
Независен кандидат Максим Димитриевски
Кандидатот за градоначалник од иницијативата „За наше Куманово“, Максим Димитриевски на денешната прес-конференција на градскиот плоштад, најави отворање деловен комплекс што ќе го користат чевларските капацитети од Куманово.
ДОМ и ЛДП
Коалицијата „Одлучно“ најави изградба на вештачко езерце и тартан патека во градскиот парк во Битола.
ГРОМ
Кандидатот на ГРОМ за градоначалник на општина Карпош Стевчо Јакимовски денеска најави уште еден голем проект за младите, овој пат за младите брачни парови.
Планот на Јакимовски предвидува општина Карпош да обезбеди државно земјиште на кое младите брачни парови ќе можат да изградат типски куќи, за што ќе бидат ослободени и од комуналии. Целта на идниот градоначалник на Карпош е да им помогне на овие млади луѓе при решавањето на еден од најсериозните проблеми со кои се соочуваат при формирањето семејство, а тоа е обезбедување дом.
ИЗБОРЕН РАПОРТ #8: Во првата недела нотирани случаи на црна кампања, политичка злоупотреба на деца, кршење на КОВИД-протоколите и други неправилности
Ова е сезона на бескрајно додворување. Во своите кампањи, политичките партии, која колку може, раскажуваат колку постигнале, а уште повеќе што ќе постигнат ако ја добијат довербата на гласачите. Цивил спроведува континуиран мониторинг на клучните политички процеси и настани во земјата во повеќе области, вели Џабир Дерала од ЦИВИЛ, во осмото издание на „Изборен рапорт“.
ЛОКАЛНИ ИЗБОРИ:
– Централиот карван „Најдоброто за мојата општина“ е меѓу граѓаните на Демир Капија и Неготино, а на централниот настан во Кавадарци ќе се обратат претседателот Зоран Заев и кандидатот за градоначалник Горан Тодоров.
– Во рамки на вториот караван ќе се обратат потпретседателот Бојан Маричиќ и кандидатот за градоначалник Перо Костадинов во Валандово.
-Коалицијата предводена од ВМРО-ДПМНЕ ќе ја претстави изборната кампања „Создади нова иднина!“ во повеќе населени места Конче, Радовиш, Струмица.
– Прес-конференција на ДУИ во Гортивар
– Иницијативата Зелен Хуман Град ќе одржи прес-конференција на тема ” Изградба на зграда”, во Паркот на Новинарите во Скопје.
-Изборни активности на Движењето „Одлучно за промени“, предводено од Зелената партија ДОМ и ЛДП во Кочани, Чешиново-Облешево и Зрновци .
– Изборни активности на Движењето Беса во Бутел и Шуто Оризари.
Д.Мишев
