Министерот за надворешни работи Никола Димитров вчера одржа средба со новата вонредна и ополномоштена амбасадорка на Сојузна Република Германија во Република Северна Македонија, Н.Е. Анке Гизеле Холштајн, која во оваа прилика ги предаде копиите на акредитивните писма.
„Покрај интензивната билатерална соработка во изминативе три години која посветено се стремиме да ја продлабочуваме и во иднина, со нетрпение го очекуваме и заедничкиот успех – првата Меѓувладина конференција да биде организирана токму за време на германското претседавање со Советот на ЕУ. Благодарни сме за досегашниот германски придонес во градењето консензус и донесување на позитивна одлука за започнување на преговори за членство во Европската Унија, во март ова година“, изјави Димитров.
Посакувајќи ѝ успех во вршењето на оваа должност, Димитров оцени дека во изминатиов период се бележи исклучително динамичен билатерален политички дијалог и соработка во повеќе области од заемен интерес.
Амбасадорката Холштајн ја повтори поддршката на Германија за реализација на нашите стратешки приоритети, подвлекувајќи дека иако германското претседавање со Советот на ЕУ е исправено пред најголемиот економски предизвик во историјата на ЕУ поврзан со заздравување на земјите погодени од коронавирусот, ќе се заложи максимално да ја засили европската перспектива на нашиот Регион, а со тоа и да обезбеди стабилност и развој на Западниот Балкан.
Министерот и Амбасадорката се осврнаа и на актуелните епидемиолошки состојби и здравствените предизвици со кои се соочува нашиот Регион и пошироко, при што министерот Димитров упати благодарност до Германија за нејзината досегашна помош за борба против пандемијата во нашата земја. На средбата стана збор и за подготовките за одржување демократски и фер предвремени парламентарни избори во Северна Македонија.
Димитров во мај годинава имаше проштална средба со претходникот на Амбасадорката, Томас Герберих.
Амбасадорот Герберих имаше значајна улога во развивањето на билатералните односи помеѓу Северна Македонија и Германија.
Димитров тогаш потенцираше дека Германија традиционално се вбројува во најважните надворешно-политички и економски партнери на Северна Македонија, укажувајќи при тоа и на фактот што токму во изминатите три години билатералните односи забележаа огромен напредок. Зголемувањето на заемната економска соработка и меѓусебната трговија ја прави Сојузна Република Германија најголем надворешнотрговски партнер на Северна Македонија.
Претседателот Стево Пендаровски на прошталната средба со германскиот амбасадор Томас Норберт Герберих се заблагодари за силната и отворена поддршка што Германија и ја дава на земјава во остварувањето на нејзините стратешки цели и изразил задоволство што токму во мандатот на амбасадорот Герберих е реализирана една од нив, односно членството во НАТО, а донесена е и одлука од страна на Европскиот Совет за почеток на пристапните преговори за членство во Европската Унија.
А. П.