Министерот за надворешни работи учествува на конференција на ОБСЕ посветена на „Доброто владеење и борбата против корупцијата во дигиталната ера,” во организација на претседавањето на Албанија со ОБСЕ, и се одржува он–лајн на 6 и 7 јули.
„Понекогаш знаеме да ги бараме проблемите кај соседите. Но вистинскиот противник не е таму. Вистинскиот противник е заеднички – корупцијата – и во овој поглед потребно е да работиме заедно и обединето“, изјави Димитров.
Во присуство на министри и други високи претставници на земјите-учеснички на ОБСЕ, министерот Димитров ја реафирмираше определбата на Владата за борбата против корупција, како клучна за враќањето на довербата на јавноста во правната држава и демократијата. Димитров посебен акцент ставил на воспоставување на порталот „Отворени финансии“ кој овозможува увид во преку 17 милијарди финансиски трансакции на буџетските корисници на централно и локално ниво, укажувајќи на одличен пример како дигиталната технологија може да придонесе кон зголемување на транспарентноста, интегритетот и доброто владеење.
Конференцијата, посветена на оваа многу значајна тема за сите земји учеснички во ОБСЕ, ја отворија актуелниот претседавач, Претседателот на Владата и МНР на Албанија Еди Рама, Генералниот секретар на ОБСЕ Томас Гремингер и министерката за правда на Република Албанија Етилда Ѓонај. Министерот Никола Димитров се обрати на панелот на високо ниво, на кој говореа и Извршниот директор на Канцеларијата на ОБСЕ за дроги и криминал (UNODC) и Генерален директор на Канцеларијата на ОН во Виена г-ѓа Гхада Фати Валу, државниот министер на Обединетото кралство, како и други министри за надворешни и за правда.
