ЦивилМедиа ја објави новата статија од министерот за надворешни работи на Украина, Дмитро Кулеба претходно објавена во угледниот украински портал NV.ua.
Кулеба во новата статија посочува дека Русија со своите постапки влева страв кај населението, и воедно уверува дека Украина е сосема спремна за евентуалниот предизвик со Русија.
„Вестите влеаја страв кај многу Украинци. За себе, роднините, постарите, децата, за иднината на државата. Раководството на Русија заслужува да биде казнето веќе затоа што ги натера Украинците да го преживуваат тоа чувство. Нам ни наметнуваат страв. Ние мора да одговориме со смиреност и издржливост.“, пишува Кулеба.
Според Кулева, Украина вложува напори во дипломатско решение на кризата, за што добива поддршка од голем број земји во светот.
„Украина има добро осмислена дипломатска стратегија за спротивставување на руската ескалација. Сега кружат тврдења дека Украина наводно го потценува нивото на закана. Но, токму ние во ноември инициравме развој на сеопфатен пакет за одвраќање на Русија, кој вклучуваше три нивоа на чекори: активна дипломатија, строги економски санкции против РФ и продлабочена одбранбена соработка со нашата држава. Сега на оваа тријада е додаден нов елемент – помош за зачувување на економската и финансиската стабилност на државата“ – со смирувачки, но решителен тон уверува украинскиот министер за надворешни работи.
Кулеба во својата статија повикува на смиреност и разум, и ја искажува решеноста дека украинската влада нема да прифати обиди за решавање на кризата на сметка на националните интереси.
„Време е да се ослободиме од емоциите и да не дозволиме некој да не потресе одвнатре. Тоа ќе биде премногу скап подарок од Русија. Уште помалку ќе прифатиме какви било обиди за решавање на кризата на сметка на националните интереси на Украина.
Кој и да даде такви предлози ќе биде одбиен. Смиреноста и издржливоста се нашиот клуч за победа“ – порачува Кулеба.
Претходно, ЦивилМедиа ја објави статијата „Безбедноста на Украина е безбедност на Европа“ од Кулеба, објавена во францускиот Le Figaro на 17 јануари 2022.