Министерката за финансии, Гордана Димитриеска-Кочоска, на својот Фејсбук профил се пофали дека разговарале за локални избори и остварила конструктивна средба со Сотир Лукровски, кандидат за градоначалник на Општина Карпош, од ВМРО-ДПМНЕ.
„Пријателска и конструктивна средба со Сотир Лукровски, кандидат за градоначалник на Општина Карпош, и пратеникот Тони Јаревски. Разговаравме за претстојните локални избори и за важноста на визијата и одговорниот пристап во управувањето со општините. Карпош заслужува нова енергија посветена на граѓаните, чесна и ефикасна локална власт“, напиша министеркатаза финансии.
Фотографијата од средбата за „локалните избори“ со партиски кандидат на ВМРО-ДПМНЕ, министерката Димитриеска-Кочоска ја објави на Фејсбук во работно време во 11:42 часот, на 6 август 2025.
Од опозициската СДСМ велат дека министерката за финансии, Гордана Димитриеска-Кочоска, јавно демонстрираше што значи класична партиска злоупотреба на државна функција. Во работно време, во кабинетот на Министерството, примила и промовирала кандидат за градоначалник на ВМРО-ДПМНЕ, како да се наоѓа во партиски штаб, а не во државна институција. За ова уште се пофалила на Фејсбук како да е дел од нејзините работни обврски.
„Наместо да се справува со инфлацијата, дефицитот и економскиот хаос кој го создава нејзината Влада, Димитриеска-Кочоска води кампања за ВМРО-ДПМНЕ, од државна функција, со државна плата и во државни простории. Мешањето на партијата и институциите беше и останува заштитен знак на Владата на Мицкоски. Министерството за финансии, кое треба да биде симбол на одговорност и неутралност, станува алатка за партиски цели и кампањи“, додаваат од СДСМ.
Дали министерката е влезена во предизборна кампања која ја реализира во работно време и користи државни простории?
Дали ДКСК и покрај тоа што нема претседател/ка ќе отвори случај за злоупотреба на позиција и државни ресурси за партиски цели?
ЦМДТ
Фото: Принтскрин, Фејсбук на Министерката за финансии, Гордана Димитриеска-Кочоска
