Одговор на барањето за извинување од Жика Стојановски
Барањето за извинување е целосно неосновано. Се базира на паушални интерпретации кои не се поткрепени со докази и аргументи. Се цитираат членови од Законот за граѓанска одговорност за навреда и клевета, и врз основа на тоа се бара извинување со формулација, дека наводите во текстот „се невистинити и со непроверена содржина“. Типичен НКВДовски ракопис.
Целта е заплашување и спречување на вакви иницијативи. Ова беше карактеристика на минатата власт, но и на многу други гарнитури со иста идеолошка матрица од периодот на едноумието. Мене нема да ме спречите со овој потег. Напротив! Во еден дел, во барањето се изразува жалење што не се наведени изворите на информации и не е понуден ниту еден писмен доказ. Ваквата интерпретацијата задира во слободата на говор и изразување дефинирани со членот 12 од Законот за медиуми. Покрај тоа, наведеното тврдење е спротивно на фактите, бидејќи во написот има факсимил од документ упатен до секторот за урбанизам на Општина Илинден, како и до Министерството за транспорт и врски. Доколку лицето кое бара извинување, но и за потребите на пошироката јавност се бара објавување на целокупната документацијата, Ве информирам дека таа е дел на иницијатива за покренување кривична постапка, формално правно покрената на 6 февруари 2018 во Министерството за Внатрешни работи, оддел за економски криминал со седиште во Скопје. Во интерес на истрагата документите во овој момент не можат да бидат објавени, но доколку добиете дозвола од надлежниот орган, сигурен сум дека професионалците од ЦИВИЛ Медиа ќе ви излезат во пресрет.
Што се однесува до контекстот во кој директно е спомнато лицето кое бара извинување, Ве упатувам на следните членови од Законот за локална самоуправа: член 50 ставовите 1, 5, 11, 13, 14 и став 15. Исто така и на општите одредби од истиот закон и тоа членовите 6, 7, и особено членот 13 во кој се дефинира поимот „одговорност“. Во текстот нема лична навреда, ниту пак клевета. Тоа не е наведено ниту во текстот на Барањето за извинување. Се работи за информација добиена од граѓани на населба Илинден, која заради природата на истрагата, во овој момент нема да ја споделиме со пошироката јавност. Изворот на информацијата проценува дека до јуни оваа година ќе стигнат првите назнаки до официјалните институции на Република Македонија.
Во име на изложување на фактичката состојба и целосно информирање на пошироката јавност, чувствувам за потреба да ги допрецизирам наводите во текстот „Покрената меѓународна истрага против градоначалникот на општина Илинден“ објавен на 30 јануари 2018. Во врска со случајот опишан во наведениот текст, би сакал да ги охрабрам надлежните институции да ја испитаат законитоста на одлуката на Советот на Општина Илинден донесена на 31 јануари 2018, архивски број 07-263/4 врз основа на која лицето кое бара извинување, на 2 февруари 2018, донело Решение со архивски бр. 08-358/1, а со кое „се задолжува надлежниот орган да издаде одобрение за градење објекти на компанијата КОЛИД КОМПАНИ АС ДОО. Објектот е веќе изграден и работи со полна пареа веќе неколку месеци. Она што ја прави целата ситуација сомнителна е Решението од 27 септември 2017 година за отстранување на изградениот објект донесено од овластени лица вработени во Општина Илинден. Дополнителна околност е што објектот се наоѓа на парцелата 1214/1, која пак е предмет на законска постапка согласно Законот за денационализација. Ова го преставува вториот дел од иницијативата од 6 февруари оваа година, за покренување на постапка согласно Кривичниот Законик на Република Македонија.
Г-дине Стојановски малку е чудна содржината, тајмингот и ревноста на барањето. Имено, сигурен сум дека Ви е познат предизборниот памфлет “Жика Стојановски и Веселата му дружина“ од предизборието на локалните избори во 2009 год. Таму се изнесени сериозни обвинувања за начинот на кои сте ја менаџирале работата на органите на општината, но и со аргументирани ставови за лажно преставување на Вашите заслуги за развојот на општина Илинден. Можете ли да и објасните на јавноста зошто за овие написи не се чувствувате навреден и наклеветен од тие наводи? За овие, но и други неправилности и сомневања во законитоста и општополезноста на Вашето работење, Ве поканувам и Ве предизвикувам на јавна дебата на место, време и простор кое Вие ќе го изберете. Докажете си ја честа, угледот, достоинството, иновативноста, интелектуалните и високо морални квалитети на дело! Верувам дека воопшто нема да размислувате да ја прифатите понудата.
Надокрај една молба. Доколку се решите да покренете тужба, Ве молам да ги оставите ЦИВИЛ Медиа надвор од неа. Тужете ме мене лично. Со драга волја и пред поширока јавност ќе ги презентирам сите податоци и аргументи пред надлежниот суд. Во исто време ги повикувам граѓаните на населба Илинден и околните населени места да се охрабрат, да се одважат во борбата против корупцијата и криминалот, и ги поттикнувам за посилен ангажман во реализација на развојот на демократските институции во општината.
Марјан С. Здравковски