Веќе втора седмица откако ДУИ најави дека по претстојните предвремени парламентарни избори, закажан за 15 јули, ќе излезе со кандидат за премиер, Албанец. Од ДУИ ги повикаа сите албански партии да им се придружат во иницијативата, но, ниту една партија не одговори позитивно на повикот на ДУИ, со аргументации во контекст на предизборни манипулации, односно, дека ДУИ не се откажува од популистички идеи секогаш пред избори.
Откако не добија поддршка од партиите, од ДУИ, на прес конференција јавно им се обратија на академската заедница, невладините и интелектуалците за поддршка на, како што велат, каузата, преку взаемна дискусија.
Иронично, Талат Џафери (претседателот на сега веќе распуштеното Собрание), кој е носител на листата на ДУИ во петтата изборна единица, на шефот на кабинетот на ДУИ, Артан Груби му посочи дека тој не е меродавен да зборува за предлогот од ДУИ за прв премиер Албанец, бидејќи не е ниту на листа на кандидати за пратеници, веднаш откако Груби даваше изјави за предлогот на дебатна емисија на темава.
-Јас сум пратеник, којшто представува политички субјект и дел од албанскиот електорат, и имам полн легитимитет за иднината на тоа што следува во парламентарниот состав”, изјави Џафери.
Од експертската заедница не ја исклучуваат координираноста на ДУИ со ВМРО-ДПМНЕ, односно веќе познатите предизборни манипулации што редовно ни ги приредуваа двете партии во изминатите изборни процеси.
Аналитичарот Роберт Несими, на дебатната емисија „Патот кон…“ изрази сомнеж за координираност на ДУИ со ВМРО-ДПМНЕ во врска со предлогот за премиер Албанец.
“Не сакам да верувам, се надевам дека не е точно, но има можност да биде уште една координација со ВМРО, бидејќи двете партии правеле такви игри и порано и единствениот адут на ВМРО против СДСМ е национализмот. Дури, пред два-три дена, на еден портал на ВМРО имаше една анализа во којашто се вели дека ВМРО-ДПМНЕ има 57 пратеници, но им треба уште малку за да достигнат до 61 за да не можат да ги условуваат за премиерот Албанец. Речникот е ист со тој што се употребуваше во 2014 година”, изјави Несими.
Ниту политичкиот аналитичар, проф. Сашо Орданоски во колумната „Среќна нова 2008 -2016! Pse jo?“, не ја исклучува можноста за координацијата на ДУИ со ВМРО.
-И така во државава има повеќе луѓе кои не веруваат во постоењето на вирусот ковид-19, отолку оние кои се сомневаат во континуираната координација меѓу Ахмети и ВМРО. Ништо тука не е спорно, бидејќи нема поприродна коалиција од оваа и за овие избори: два стари партнери со долг стаж на партиска и персонална соработка, со перфектно разбирање на обостраните квази-националистички потреби и големите инвестирани (и реинвестирани) заеднички интереси.
Рака на срце, таа меѓупартиска соработка, по своите изборни шанси, не е за потценување. Многу пати претходно е извежбана и дава проверено добри резултати. Не е едноставно изборно да се порази – освен тоа да го направат самите гласачи, се разбира, на фер и демократски избори. За што се создадени многу околности.
Професорката Мирјана Најчевска реагираше на предлогот со истакнување на квалитетот пред етникумот и посочи:
„До сега, етницитетот е искористен единствено за тоа зад него да се скрие неквалитетот, незнаењето, неискуството, измамата! … Сѐ додека образованието не се мери според квалитетот туку според јазикот на кој се изведува, Македонија ќе паѓа на сите листи на едуцираност, писменост и образовна понуда. Јазикот, културата и традицијата се важни работи, и се дел од идентитетот на индивидуите и групите. Меѓутоа, нивната употреба во дефинирањето на политичката сцена во Македонија нема врска со нивната заштита, промоција или практикување“, вели Најчевска.
Како одговор на прашање од ЦИВИЛ Медиа за став по предлогот на ДУИ за прв премиер Албанец, генералниот секретар на Алијансата за Албанците, и градоначалникот на општина Гостивар, Арбен Таравари изјави:
– Во принцип, со ниеден закон не било и не е забрането да се избере Албанец на која било државна позиција во Република Северна Македонија.
ДУИ шест пати ги доби парламентарните избори, и ниту еднаш не споменале за позиции за министер за финансии, министер за надворешни работи, министер за внатрешни работи, а не па за премиер! – вели Таравари.
Во принцип, ние (Алијансата за Албанците) сметаме дека една од овие три клучни позиции би требало да биде застапена од Албанец, но,тоа секако би требало да се направи со политички договор помеѓу тие што го сочинуваат мнозинството во влада. По 30 години многупартиски систем во Македонија, на денот за прв пат се избра Албанец Претседател на Собранието, лидерот на ДУИ не беше присутен за гласање на истиот, и затоа, и сега сметаме дека нивниот предлог е предизборна демагогија и лага, како и многу други во изминатите 18 години, вели Таравари.
Активисти – младинци на иницијативите „Зошто да не” и „Верувам” пред неколку дена одржаа собири пред седиштата на двете најголеми партии ВМРО-ДПМНЕ и СДСМ, со порака дека е дојдено време за Албанец премиер.
„Со години со политиката во Македонија владееше исклучиво двојката на македонските партии, што пред сè ни наштети нам, албанската младина на оваа земја. Денес сме тука, пред седиштето на двете македонски партии, кои реагираа толку остро и исклучувачки кон нашата легитимна и праведна амбиција, да кажеме дека дојде нашето време. На овие избори, ние, албанската младина, ќе одиме до крај за еднаквост и слобода, пат кој што го започнаа нашите родители и баби и дедовци пред три децении. Не сакаме да продолжиме да ги гледаме нашите пријатели и семејство како ја напуштаат земјата. Ние сакаме целосна еднаквост. Ова е наше време! Време е за албанскиот премиер! Време е да се исполни сонот и да се заврши патувањето!”, гласеше пораката на младите активисти од ДУИ кои ја промовираа идејата на ДУИ за прв премиер Албанец.
Минатата вечер, претседателот на ДУИ, Али Ахмети, гостуваше во емисија на ТВ Клан во Албанија, во услови на пандемија од Ковид-19, за промовирање на партиска предизборна агенда.
Како што се чини, од ДУИ сепак немале конкретна личност којашто би ја кандидирале за премиер, па сега се во потрага низ различни канали. Идејата, секако дека не е за отфрлување, бидејќи под македонското небо навистина постојат способни, квалитетни личности, Албанци, коишто би можеле достоинствено да ја вршат должноста премиер на Влада. Кваката е што тие Албанци под никаков услов не би се согласиле да бидат предложени од партии, а поготово од ДУИ.
Д. Тахири