Во Газа не е влезена никаква хуманитарна помош повеќе од два месеци, што претставува најдолга ваква блокада и предизвикува голема загриженост, се наведува во заедничката изјава на високата претставничка на ЕУ за надворешни работи и безбедносна политика Каја Калас и еврокомесарките за Медитеранот и за еднаквост, подготвеност и справување со кризи, Дубравка Шуица и Хаџа Лабиб.
– Агенциите на ОН известуваат дека резервите на храна се исцрпени и дека повеќето домаќинства немаат безбедна вода. Повторно започнаа ограбувањата на магацините. Хуманитарците продолжуваат да предупредуваат дека гладот во енклавата се шири и се продлабочува, се наведува во изјавата.
Во неа се додава дека ЕУ го повторува својот итен повик до Израел веднаш да ја укине блокадата на Газа, во услови кога на границата чекаат тони помош, што претставуваат залихи за три месеци за населението од 2,2 милиони.
– Откако ќе биде укината блокадата, ситуацијата со храната би можела многу брзо да се подобри. Како окупаторска сила, Израел е должен според меѓународното право да обезбеди хуманитарната помош да стигне до населението на кое му е потребна. ЕУ е исто така загрижена поради новиот „механизам за испорака на помош за Газа“, наводно одобрен од израелскиот Кабинет за безбедност на 4 мај, кој е во спротивност со хуманитарните принципи, како што е нагласено од агенциите на ОН и хуманитарните партнери. Механизмот би ја префрлил одговорноста за дистрибуција на помошта на нехуманитарни меѓународни актери и изведувачи на приватни безбедносни услуги, посочуваат членовите на ЕК во изјавата.
Ти наведуваат дека ЕУ упатува јасна порака оти хуманитарната помош никогаш не смее да се политизира, а нејзиното користењето како средство за војна е забрането според Меѓународното хуманитарно право.
– Помошта мора да стигне до цивилите на кои им е потребна. ЕУ, исто така, го повикува Израел да дејствува врз основа на предлозите на ОН според механизмот 2720 и да обезбеди целосно почитување на меѓународното хуманитарно право и на основните принципи на хуманитарната акција – хуманост, непристрасност, неутралност и независност, преку конструктивна дискусија со ОН и назначените невладини организации, се потенцира во изјавата.
Во неа натаму се нагласува дека ЕУ го повторува својот повик за продолжување на прекинот на огнот и итно и безусловно ослободување на заложниците, што ќе доведе до траен крај на непријателствата.
– ЕУ ја повторува својата непоколеблива поддршка за палестинскиот народ. Од 2023 година, преку воздушни мостови на ЕУ беа доставени над 3.800 тони помош, а над 450 милиони евра хуманитарна помош беа доделени на Газа. По повод првиот политички дијалог на високо ниво меѓу Европската Унија и Палестинската самоуправа, Комисијата објави повеќегодишна сеопфатна програма за поддршка во вредност до 1,6 милијарди евра, за поттикнување на палестинското закрепнување и отпорност, се додава во изјавата.
