пишува: КОСТА СТОИМЕНОВСКИ
Мошне богат шпански бизнисмен, македонски зет, кој е голем љубител на Македонија и кој секоја година својот летен годишен одмор го користи во еден елитен охридски хотел, е зачуден поради високите цени на вината, не само во рестораните, туку и во продавниците! Предупредува дека, од почетокот на наредната година кога Македонија ќе мора да го отвори својот пазар за увоз на вина од странските земји, македонските винари, кои се сега максимално заштитени, ќе бидат соочени со жестока конкуренција на големите светски производители на вино: Франција, Шпанија, Италија, Португалија, Чиле, Аргентина, Австралија итн.
Пред дваесетина години, цената на шише вино „Т’га за југ“ во продавниците беше половина американски долар. Пред десетина години, пак, цената на ова вино беше околу три германски марки, односно 1,5 евра, а сега се продава по цена од скоро 4 евра! Општопознато е дека стандардот на македонските граѓани е мошне опаднат, така што сѐ помал број луѓе можат да си дозволат да купуваат вино, па се определуваат за пиво. На светските пазари се води немилосрдна конкурентска борба меѓу големите производители на вино од спомнатите, но, и од некои други земји.
Македонските винари водат политика заснована на принципите на првобитната акумулација и го зголемуваат својот капитал на грбот на лозарите! Диктираат ниски цени на грозјето, а на лозарите не им го плаќаат грозјето ни по една, две па и повеќе години! Каде го има тоа? Зачудувачки е тоа што ваквите ненормални состојби ги толерира државата! Некои мои пријатели кои се занимаваат со домашно производство на вино тврдат дека за 1 литар вино се потребни 2,5 килограми грозје, чија цена се движи од 8 до 10 денари. Па сега направете го „есапот“ и ќе видите дека винарите водат егоистичка и кратковида „политика“! Ваквата „политика“ на винарите сега ги погодува лозарите, но, веќе утре ќе им се врати како бумеранг и на винарите!
Во повеќе наврати предупредував дека во услови на „галопирачката“ глобализација, Македонија може да смета барем на некакви компаративни предности во производството на храна. Општопознато е дека Македонија има идеални услови за производство на грозје, но, државата никогаш немала и сѐ уште нема стратегија за развој на лозарството и посебно на винарството! На лозарите и на винарите им е потребна едукација со цел да се запознаат со светските стандарди во нивните области. Таа едукација може да ја помогне само државата со соодветни програми, а не со фаворизирање на поединци блиски до власта!
Пред околу една година јавно прашував зошто државата во склопот на дисперзијата на високото школство не предвидела отворање на факултет за енологија во Кавадарци или Неготино и сугерирав што треба да се направи на тој план. Се израдував кога слушнав дека е донесена одлука за отворање на факултет за енологија во Неготино, но, не се знае дали и колку студенти се запишани на него и кој им предава?
Стратегијата за основање на голем број мали фирми за производство на вино не е соодветна за мали и сиромашни земји како што е Македонија! Доколку сака да се носи со жестоката конкуренција на светските пазари на вино, Македонија мора да се определи за сопствен бренд во производството на евтино вино за широка потрошувачка. Тоа што некои наши вина добиваат високи признанија/награди на некои саеми на вино, не е никаква гаранција за нивниот пласман на светските пазари, посебно и поради ограничените количини на наградени вина! Наградените вина ги оценуваат и наградуваат мал број на дегустатори, додека потрошувачите на вино треба да се освојуваат со ниски цени и стандарден квалитет, односно со признат бренд. Малите производители не се способни да изградат свој бренд, бидејќи тоа чини многу пари, така што останува на државата да осмисли и да подготви соодветни стратегии и програми за развој на лозарството и винарството и истите да ги реализира.
Скопје, 15 септември 2010 година
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.