МВР и Јавното обвинителството ќе истражуваат што се случило минатиот викенд во извидничкиот камп организиран од Првиот скопски извиднички одред. Случајот го обелодени „Слободен печат“, со сведоштва на родители чии деца биле дел од кампот, кои тврдат дека од нив се барало да глумат секс пози, да симулираат секс, да се соблекуваат. Но, случајот во јавноста се злоупотребува и за пласирање дезинформации и за оцрнување и на други субјекти.
Одредени медиуми, но и профили на социјалните мрежи, објавија дека Град Скопје и СОРОС го финансирале извидничкиот одред што организирал сексуални активности на кампот со средношколци насловен „Есенски бакнежи и прегратки, секс скаутс и рок енд рол“.
Но, Фондацијата Отворено општество – Македонија ги демантираше написите кои се појавија во Курир, Република, Нетпрес, Лидер и Плус Инфо, а кои имплицираат дека ФООМ го финансирал извидничкиот настан.
Изнесените информации се комплетна невистина и претставуваат дезинформирање на јавноста, велат велат дека Фондацијата, и посочуваат дека во рамки на концептот „Зелен скок-партнерства за климатска акција“, дала поддршка за проект на Прв скопски извиднички одред, но неговата цел била неформална едукација за деца и млади во природа и подигнување на јавната свест за заштитата на животната средина.
По демантот на Фондацијата Отворено општество – Македонија, порталот Плусинфо ја избриша веста од својот сајт дека „ФОНДАЦИЈАТА СОРОС ГИ ФИНАНСИРАЛА СЕКС СКАУТИТЕ“, меѓутоа веста се уште стои зачувана на нивниот Фејсбук профил. Со оглед на тоа дека граѓаните читаат само наслови, ваквата вест ги доведува во заблуда читателите.
Инаку, од Град Скопје, по објавите дека финансирале ваков настан, најавија дека го прекинуваат договорот со Првиот скопски извиднички одред и се оградија од активностите, кои предизвикаа бурни реакции во јавноста. Додаваат дека во проектната документација што ја доставил кампот до нив, не била наведена спорната активност.
Од Првиот скопски извиднички одред (ПСИО), по неколкудневен молк, соопштија дека откако внимателно го разгледале случајот, сметаат дека сведочењата за настанот биле извадени од контекст, а игрите погрешно протолкувани.
Мониторинг тим на ЦИВИЛ