Пред седиштето на НАТО во Брисел во 15 часот ќе биде организирана церемонија на подигање на македонското знаме.
Во моментов се прават последните подготовки за подигнување на знамето на Македонија како 30. членка на Алијансата.
Слична свеченост се планира и во Врховната команда на НАТО-сојузничките сили за трансформација во Норфолк во Вирџинија, САД.
„Членството на Северна Македонија во НАТО ќе доведе до подобра интеграција, демократија и безбедност во целиот регион. Членството на Северна Македонија исто така потврдува дека останува отворена вратата и за сите други земји, кои сакаат и можат да ги остварат реформите потребни за достигање на НАТО стандардите“, наведе американскиот државен секретар Мајк Помпео пред неколку дена.
Тој нагласи дека влезот во НАТО претставува врв на напорите правени во текот на многу години од Владата и народот на Северна Македонија за членство во Алијансата.