Градоначалникот на Општина Центар, Горан Герасимовски, свикал итна вонредна седница на Советот во четврток за доделување хуманитарна помош за настраданите во катастрофалниот земјотрес во Туркије.
Герасимовски, како што информираат од општинската прес-служба, испратил и телеграма со сочувство до турскиот амбасадор во земјава, Хасан Мехмет Секизќок.
-Во моментов кога Вашата земја се соочува со катастрофална несреќа поради серијата земјотреси што го погодија јужниот дел на Туркије, сакам вам, на целиот турски народ и на семејствата на настраданите да Ви изразам искрено сочувство, и длабока тага поради изгубените животи и материјалната штета, пишува во телеграмата на градоначалникот.
Општина Центар и јас како нејзин градоначалник, додава Герасимовски, ќе вложиме максимални напори со Црвениот Крст на Република Северна Македонија да обезбедиме и пратиме помош од секаков вид што во овие услови му е најпотребна на погоденото население.
-Централното градско подрачје на Скопје се уште со болка се сеќава на земјотресот во 1963 година и подадената рака со помош од целиот свет. Токму затоа ќе преземеме се што е во наша моќ барем малку да помогнеме во оваа трагична состојба за турскиот народ, пишува во телеграмата Герасимовски.
Општина Центар негува традиционално добри односи со Република Туркије и тамошните општини. Доказ за добрата соработка меѓу останатото, се и збратимувањата со двете општини Бејоглу во Истанбул и Четинкаја во Анкара. Во овие тешки времиња за нашите пријатели во Туркије целата помош и поддршка е потребна и исклучително важна.
