Владиниот портпарол Штефан Зајберт на прес-конференција вчера во Берлин пренесувајќи ја честитката од канцеларката Ангела Меркел до новиот грчки премиер Киријакос Мицотакис, истакна дека решението на долгогодишниот спор за името од страна на владите во Скопје и Атина е историско достигнување што треба да се почитува.
Портпаролот Зајберт изјави дека тоа достигнување од двете страни овозможило нормализација на односите меѓу двете држави и дека искрено се надеваат дека новата грчка влада конструктивно ќе учествува во тој позитивен процес.
Канцеларката Меркел во честитката до Мицотакис, вели дека со нетрпение очекува да се сретнат и дека се надева на блиска и пријателса соработка и продолжување на партнерските односи меѓу Германија и Грција.
И германските Зелени упатија барања за да се почитува Преспанскиот договор.
Портпаролот на Зелените и пратеник во Бундестагот Мануел Сарацин изјави дека очекува од Владата на Мицотакис да ја продолжи поддршката на Северна Македонија и да не ја ризикува иднината на земјата.
Тој додаде дека спорот за името е решен, мора да остане така и дека затоа сите европски влади, наесен треба да одобрат почеток на преговорите за членство на Северна Македонија во ЕУ.
