Бранко Героски, главен и одговорен уредник на „Слободен печат“ на конференцијата „Какви избори – таква иднина“ во организација на ЦИВИЛ – Центра за слобода, изјави дека вообичаена и легитимна пракса е медиумите ако сакаат – да заземат страна во текот на изборите, односно, доколку сакаат, можат да се определат за еден од кандидатите за претстојните претседателски избори, па дури и да навиваат за истиот.
„Во нашата пракса тоа се случи при промената на власта, во 2016 година, бидејќи имавме еден став дека е многу важно Македонија дефинитивно да се ослободи од еден режим кој ја држеше заробена и изолирана од светот и одлучивме дека треба сите ние како граѓани, да дадеме еден личен придонес во таа насока и тоа го направивме. Транспарентно, јавно и легитимно“, изјави Героски.
Тој додаде дека за претстојните претседателски избори се одлучиле да не направат таков сличен потег и да не се определуваат за страна во изборите.
„Размислувајќи за иднината на Македонија, мој личен став и на моите пријатели со кои долго време сум колега, е дека иднината на оваа земја зависи од тоа дали ќе успееме во текот на наредните две или три години, да го намалиме нивото на конфликтноста во општеството, кое сега екстремно е високо. Најважно е што во овој изборен процес гледаме како на шанса да дојде до извесно намалување на конфликтноста, и поради тоа, мораме многу внимателно да ги следиме и да ги пренесуваме пораките на сите тројца кандидати. Имаме некакви нови интересни форми на водење кампања, имаме повеќе забава во текот на овие избори, се трудиме да го наметнеме мислењето дека забавата е додатен дел од циркусот кој се нарекува избори, но не за говор на омраза, туку служи за да се насмееме“, додаде Героски.
Тој вели дека со големо влијание ќе ги следат прекршувањата, за кои слушнал дека сега се намалени, но во медиумот што го уредува – сепак, ги забележуваат.
„Нашиот сензибилитет кон сите прекршувања и кон сите појави на грешки е многу зголемен и поради тоа е перцепцијата дека можеби ние во медиумите сме прекритични. Тоа е така затоа што сега сме многу сензибилни, на ниту едни избори немавме ветување дека ќе имаме нулта-толеранција за корупција, за непотизам, за злоупотреба на јавни фондови за политички кампањи“, изјави Героски.
Тој додава дека доколку државата продолжи да биде „ковачница“ на конфликти, како во овој момент, тоа сериозно ќе го забави нејзиното напредување кон цивилизираниот свет кон кој тежнее и додава дека се надева оти претседателските избори ќе направат некаков исчекор напред.
Ангела Петровска
Камера: Трпе Стојкоски
Монтажа: Ариан Мехмети
Фотографија: Тим на ЦИВИЛ
