Очекувањата за 2018 година, како граѓанин, се можеби малку посветли од она што се случуваше во изминатиот период, но мене ми е смачено секогаш да одбирам меѓу две зла, помалото, вели Душко Груевски, граѓански активист, во разговор со ЦИВИЛ Медиа за Перспективи 2018.
„Можеби ми се розови очекувањата за 2018, но за понатаму сум скептик дека Македонија ќе замине во некоја правилна насока, доколку не се случи некој надворешен фактор и малку повеќе не ги заузди оние што ја водат државата, па донекаде да имаме добар правец“, вели Груевски.
„Неодамна пишував едно мало колумниче и си ја анализирам онаа народна изрека: „Прост народ, силна држава“. Сметам дека најдобро ја опишува нашата држава и она што ќе ни се случува и во 2018 бидејќи народот останува таков каков што е, жеден да слуша она што ќе му го сервираат, нема желба да се едуцира самиот да види каде треба да се насочи и ќе оди онаму каде пастирите ќе го насочуваат, сакате на световен план, духовен или на кој план сакате, не очекувам ништо подобро од она што сега ни е секојдневие.
Препораките ми се да ја смениме изреката „Прост народ, силна држава “. Народот да се едуцира правилно, што е обврска на оние кои се доволно едуцирани, мислам на граѓанските организации, иако ме разочараа 99% од тие чинители што требаше да бидат критичка мисла и даостанат, ајде ако не независни, на средина, бидејќи на вагата има, покрај тасовите една средишна оска која всушност го прави балансот и очекувам тие, меѓу кои и јас влегувам нешто повеќе од три години, ќе останат на нивото на задачата поради која и постојат. Значи, сум разочаран“, објасни Груевски.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество. „Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Маја Ивановска
Камера: Дехран Муратов
Обработка на текст и фотогорафија: Биљана Јордановска
Монтажа: Ермин Климента