Бројот на регистрирани случаи на дискриминација во нашата земја бележи раст од 30 проценти, откако во 2018 година се регистрирани вкупни 119 случаи, наспроти 82 случаи регистрирани во 2017 година, покажуваат денеска објавените податоци од годишниот информатор за дискриминација на Хелсиншкиот комитет за човекови права.
Најчести основи за дискриминација во регистрираните случаи се врз основа на личен и општествен статус, пол и род, сексуално ориентација, попреченост, етничка припадност и религија.
Според проект-координаторот Игор Јадровски, има значително зголемување на пријавување дискриминација во областа на работните односи.
– Тоа е област во која граѓаните најмногу пријавувале дискриминација во 2018 година. Имаме 45 случаи на дискриминација во работните односи, што е значително зголемување во споредба со 19 случаи пријавени во 2017 година, изјави Јадровски.
Посочи дека има и значителен раст во бројот на пријавени случаи на дискриминација во пристап до јавни добра и услуги – 21 и до здравствени услуги – 20 пријавени случаи.
– Забележително е што годинава има значително намалување во пријавувањето на случаи на дискриминација во образование. Ако во 2017 имавме 23, годинава има седум пријавени случаи на дискриминација во образование, истакна Јадровски.
Од вкупниот број пријавени случаи, најголем дел – 92, се директна дискриминација, додека еден како индиректна и 26 како случаи на вознемирување.
Здруженијата на граѓани и државните инстуции годинава имаат дадено 95 реакции во однос на случувања поврзани со дискриминација, што исто така е тренд на зголемување, во однос на 68 реакции во 2017 година.
Според Јадровски, годинава има значително помал број пријавени случаи на судски случаи на дискриминација од граѓанските организации. Во 2018 година пријавени се вкупно седум судски постапки, од кои во две има позитивни одлуки, во две негативни и три се уште се водат како тековни.
– Во постапувањето на Народниот правобранител имаме тренд на конзистентност. Имаме вкупно 92 постапки по кои постапувал во 2018 година, од кои во 31 утврдил дискриминација, во 47 постапки не утврдил и има 15 активни постапки, чија завршница доаѓа во 2019 година, изјави Јадровски.
Посочи дека има зголемување на бројот на иницирани постапки на Комисијата за заштита од дискриминација, односно 119 постапки во 2018 година, од кои за 19 е дадено позитивно мислење.
Според податоците добиени од судовите како информации од јавен карактер, посочи Јадровски, судовите имаат иницирано 36 постапки за заштита од дискриминација во 2018 година и имаат донесено 49 одлуки, од кои 28 се позитивни и е утврдена дискриминација и пет се правосилни одлуки.
Информаторот е изработен во соработка со Мисијата на ОБСЕ во Скопје, во рамки на проектот „Унапредување на човековите права“. Во него се сублимирани податоци добиени од здруженија на граѓани за ригистрирани случаи на дискриминација, информации од јавен карактер добиени од првостепените судови за рбојот на судски постапки и обработка на податоци од Комисијата за заштита од дискриминација и Народниот правобранител.
Извор: МИА
