Според најновата анализа на на Меѓународниот институт ИФИМЕС со наслов „Северна Македонија 2021: Албанците ја предаваат државата во руски раце?“, аналитичарите сметаат дека изненадувачки е фактот што некои Албанци се во функција на остварување на руските интереси.
„Задкулисните настани на македонската политичка сцена покажуваат дека дел од Албанците се уште тесно соработуваат со ВМРО-ДПМНЕ и со Никола Груевски. Соработката на македонските Албанци со Русите не е запишана во современата историја на Албанците, кои своите стратешки односи ги градеа пред се со САД. Настаните во Северна Македонија се особено опасни, бидејќи во исто време се синхронизирани со настаните во Босна и Херцеговина како најава за нова дестабилизација на регионот, не исклучувајќи ги вооружените конфликти“, се предупредува во анализата.
Според ИФИМЕС, дефинитивно, „некои Албанци ќе застанат на страната на Русија со своите погрешни политички потези и ќе ја предадат Република Северна Македонија на Русија, со што ќе ја изневери довербата на албанските гласачи“.
Во анализата на ИФИМЕС се посочува дека е индикативно е што две земји од регионот, членки на НАТО и ЕУ, активно учествуваат во операцијата „Коњички скок“, едната со нудење азил на Груевски, а другата со блокирање на Северна Македонија за почеток на преговори за членство во ЕУ. Двете земји имаат истомисленици во опозициските партии во Северна Македонија.
„Така, овие две држави на тој начин дејствуваат директно против интересите на организациите во кои се членови. Ваква акција не е забележана во досегашната историја на двете организации, а тие веќе треба да предизвикаат голема загриженост во Брисел. Загрижувачки е фактот што клучните безбедносни предизвици и закани за Северна Македонија доаѓаат од земји-членки на НАТО, чиј член е и Северна Македонија“, се посочува во анализата.
Од друга страна, ИФИМЕС вели дека аналитичарите веруваат дека извршната наредба на американскиот претседател Џозеф Бајден претставува предупредување и порака до сите во регионот на Западен Балкан но и до македонските власти да ја интензивираат борбата против криминалот и корупцијата и да се спротивстават на негативните појави и поединци кои можат да го загрозат регионалниот мир и стабилност и просперитет.
„За Република Северна Македонија е од особено значење сите кои го попречуваат или не го признаваат Договорот од Преспа, кој донесе мир, стабилност и просперитет во Северна Македонија, да бидат санкционирани и ставени на „црната листа“ на американската администрација“, се нагласува во анализата.
Според ИФИМЕС, со доаѓањето на власт на актуелната власт во 2017 година, во земјата повеќе не се забележани меѓуетнички инциденти, а се посочува и дека според меѓународните индекси, Северна Македонија е најбезбедна држава.
