БОМБИ „Илија Громовник“ од Будимпешта, преку руската ВКонта́кте, споделен прво од „Трета политика“
На руската социјална мрежа „ВКонтакте“ корисникот со псевдонимот „Илија Громовник“ синоќа повторно објави нов прислушуван разговор, во кој тврди дека се слуша гласот на пратеникот Павле Богоевски.
На профилот стои дека моменталната локација му е Будимпешта и најавува дека ова е прва од новиот сет „бомби“.
На само два дена пред почетокот на изборниот молк, на руската социјална мрежа ВКонта́кте од анонимен профил, истоименуваниот профил беа објавени прислушувани телефонски разговори на функционери од власта и личности кои се поврзуваат како блиски до неа, но и на личности од опозицијата како поранешната министерка за внатрешни работи, Гордана Јанкуловска.
На Фејсбук, пак, постојат повеќе профили со истото име, што пропагираа бојкот на претстојните претседателски избори.
Уште поинтересен е фактот што објавените разговори најпрво беа споделени од Фејсбук страницата на Трета политика поврзан со Љупчо Палевски.
Од Министерството за внатрешни работи и Специјалното јавно обвинителство нема повеќе информации освен дека се изненадени од објавените разговори. СЈО, во изјава за ТВ 24 гарантираа дека од кај нив нема „протечено“ ниту еден материјал и најавија проверка на тоа дали и тие ги поседуваат овие разговори.
Според содржината на објавените разговори, станува збор за досега необјавен материјал.
На повидок е скандал поврзан со прислушуваните разговори кои се дел од долгите преговори меѓу власта и опозицијата. Имено, во овој период актуелен е обидот на опозицијата, преку преговори со власта, да ги минимизира улогата и ингеренциите на СЈО, а прислушуваните разговори да ги маргинализира како докази во судските постапки против поранешни високи владини функционери, вклучувајќи го и поранешниот премиер Груевски. Впрочем, сега власта преговара со партијата што го организираше масовното прислушување и спроведуваше криминална власт, за судбината на СЈО кое токму нив ги гони. Законот кој треба да се донесе се уште е во фаза на преговори, а е еден од клучните услови за добивање на датум за преговори со Европската Унија.
Според Законот за заштита на приватноста донсен во 2015 година, објавувањето на вакви разговори е забрането.
„Со законот се утврдува и забрана за поседување, обработка, јавно објавување и располагање на било кој начин со материјали кои произлегуваат од незаконското следење на комуникациите извршени во периодот од 2008 до 2015 година, вклучувајќи и нивно користење и располагање во изборен процес, политички или други цели и постапки“.
„Тој што ќе му овозможи на неповикано лице да се запознае со разговор или изјава која што е прислушувана или тонски снимена ќе се казни со казна затвор до една година, доколку содржината на разговорот ја нарушува приватноста на личниот и семејниот живот. Оваа одредба не се однесува на разговор или изјава од јавен интерес“, се вели во членот 4, став 1.
