На полноќ истекува рокот за јавен увид во Избирачкиот список за локалните избори 2017, кои ќе се одржат на 15 октомври.
Граѓаните можеа да извршат увид во подрачните одделенија и канцеларии на Државната изборна комисија (ДИК), како и електронски преку интернет страницата на ДИК.
Од многуте пријави кои сè уште пристигнуваат на адресата на ЦИВИЛ – Центар за слобода, може да се заклучи дека избирачкиот список повторно е со старите проблеми. Фантомски гласачи во супермаркети, избришани постоечки гласачи и адреси, како и оставени фантомски гласачи на адреси на граѓани кои и по неколку пати до сега пријавиле, како во подрачните одделенија, така и во Минситерството за внатрешни работи.
Според прегледот на Државната изборна комсија, до 6 септември увид во Избирачкиот список во подрачните одделенија и канцеларии на ДИК извршиле 20.081 граѓанин, а 148.538 граѓани електронски ги провериле своите податоци преку нивната веб страница.
Според Роковникот, во рок од пет дена по завршување на јавниот увид, Комисијата треба да го достави Избирачкиот список до политичките партии кои, пак во рок од пет дена треба да ги достават своите забелешки до ДИК.
По поднесените барања, ДИК одлучува во рок од три дена, а против решението на ДИК, политичките партии може да поднесат тужба до Управниот суд во рок до 24 часа од приемот на решението. Управниот суд е должен да одлучи во рок од 24 часа од приемот на тужбата.
Избирачкиот список во кој се извршени сите промени од јавниот увид, ДИК го заклучува најдоцна 14 дена по завршениот јавен увид, односно најдоцна до 24 септември. Заклучениот избирачки список ДИК го потпишува најдоцна 15 дена пред денот на одржување на изборите.
Јавниот увид во Избирачкиот список почна на 21 август. Во меѓувреме најголемите политички партии ги објавија кандидатите за градоначалници за локалните избори. Кандидатските листи за градоначалници и советници според Роковникот на ДИК треба да бидат поднесени до општинските изборни комисии најдоцна до 14 септември.
Кампањата за локалните избори започнува на 25 септември и завршува на 13 октомври на полноќ. Локалните избори ќе се спроведуваат во 80 општини и во Градот Скопје во над 3.400 избирачки места.
На предвремените парламентарни избори во 2016 година право на глас имаа вкупно 1.784.416 според финалниот извештај на ДИК . На денот на гласањето, на 11 декември 2016 година, своето гласачко право го
оствариле вкупно 1.153.962 граѓанки и граѓани.
ЦИВИЛ – Центар за слобода ги повика граѓанките и граѓаните да соработуваат со ДИК и со другите релевантни институции во процесот на ревизија на Избирачкиот список, со оглед на претходно изборно искуство, помошта од гласачкото тело се покажа како неопходна во процесот на прочистување на Избирачкиот список.