ПЕТРИТ САРАЧИНИ
И на овие локални избори, како и на сите избори низ годините, изборната битка за Град Скопје е несомнено најважната, не само за локалните теми. Скопје, како главен град, како центар на администрацијата и бизнисот во кој живее или кон гравитира речиси половина од државата, но и со својата демографија, со право претставува репер и највидлив показател за расположението на граѓаните за актуелните состојби во земјата.
Сериозни резултати се невозможни без партиска поддршка
Првиот изборен круг заврши, резултатите се познати за јавноста, претстои втор изборен круг за градоначалник во кој влегоа кандидатката поддржана од ВМРО-ДПМНЕ, Данела Арсовска и кандидатот на СДСМ, актуелниот градоначалник Шилегов.
Во второто полувреме, Арсовска влегува со предност од неколку илјади гласови пред Шилегов, но и охрабрена од успехот во првиот круг, веројатно очекувајќи гласачите по инерција да го засилат тој успех и во вториот, што обично се случува во вакви ситуации на изборите.
Кај нас е речиси невозможно да се имаат сериозни резултати во изборната битка без партиска поддршка. Но, исто така е неспорно дека освен партиската поддршка, друг одлучувачки фактор е и квалитетот на предложениот кандидат, а најмногу способноста да придобие гласови од партиски неопределените.
Па, да видиме, колку од потенцијалот на Шилегов и Арсовска, а и на другите кандидати што трчаа за градоначалник на Скопје поддржани од партиски и други коалиции, се должи на гласовите од членови и симпатизери на партиите и иницијативите и оние што гласаа за советничките листи, а колку тие самите успеале да привлечат гласови надвор од партиската кампања, поддржувачи и гласачи на тие опции.
Арсовска води, Шилегов мобилизира многу повеќе гласови надвор од партиската поддршка
Арсовска води, Шилегов мобилизира многу повеќе гласови надвор од партиската поддршкаАко се направи оваа споредба, најголем скор има кандидатот на СДСМ и коалицијата Петре Шилегов. Листата на СДСМ за Советот на Скопје освои 53.204 гласови, додека Шилегов 78.783, односно над 25 илјади гласови повеќе. Добар дел од тие гласови веројатно и можно е да се должи на поддршката од коалициските партнери што немаа кандидат за градоначалник, како ДУИ која добила 26.351 гласови, а и ДПА со 679 гласови и БЕСА со 2.303 гласови, но и тоа е показател дека кандидатот сепак бил прифатлив и за тоа гласачко тело, а веројатно и за други гласачи од други партии или неопределени, коишто очигледно гласале за Шилегов.
Данела Арсовска, која ја доби поддршката од ВМРО-ДПМНЕ, освоила 86.698 гласови, за разлика од партијата и нејзината коалиција кои освоиле 79.409 гласови за Советот на Скопје. Разликата е над 7000 гласови повеќе Арсовска, но и тука треба да се има предвид дека и Арсовска сметаше на поддршката од коалицијата Алијанса за Албанците – Алтернатива, која освои 11.448 гласови за Советот на градот. Но, очигледно, Арсовска не била толку прифатлива како Шилегов, и за гласачите на ААА-АА и покрај партиските насоки да ја поддржат, а и за други гласачи.
Како поминаа другите кандидати за градоначалник на Скопје што отпаднаа во првиот круг?
Левица со листата за советници во Град Скопје освои 20.333, а кандидатот Петар Георгиевски Камиказа донел едвај 300 гласа повеќе, односна 20.609 гласачи му ја дадоа довербата во првиот круг.
Слично, но малку подобро стои независната кандидатка Ана Петровска, споредено со листата на коалицијата што ја предложи. Листата за Советот на „Зелен хуман град“ предводена од Драгана Велковска, освоила 9.223 гласови, додека пак кандидатката за градоначалничка, Ана Петровска успеа да освои 9.954 гласови, или над 700 гласови повеќе.
Најлошо споредено со партиската листа помина кандидатот за градоначалник предложен од ДОМ и ЛДП, Арбен Шаќири. Коалицијата „Одлучно за промени“ на ЛДП/ДОМ со кандидатската листа за Советот на Скопје освоила 9.287 гласови, а нејзиниот кандидат Арбен Шаќири Бени освоил 8.911 гласови, што претставува 370-тина гласа помалку од коалицијата што го предложила.
Кај помалите партии, кандидатите главно успеале да мобилизираат повеќе гласови, но далеку од доволно за да се сметаат за некаква позначајна додадена вредност за партиите што ги предложиле. Твоја партија освои 1.535, а нејзиниот кандидат Александар Тортевски 2.669, односно 1100 гласови повеќе. Листата на РМ освоила 971 глас, а нејзиниот кандидат за градоначалник Владимир Трајковски 1.739 гласа, околу 750 гласови повеќе. БДС освоиле 1.123 гласови, а кандидатот Мунир Колашинац над 500 гласови повеќе односно 1.681.
Од оние под и околу 100 гласа, Интегра освоиле 929, а нивниот кандидат, д-р Тодор Ношпал 1.332, односно 400-тини гласови повеќе. Славе Несторовски освоил 613 гласа, 100 повеќе од неговата со ТМРО 514 гласа. Листата на Демократи освои 397 гласа, а нивниот кандидат за градоначалник Љубомир Јосифовски 439, или околу 40-тина гласови повеќе.
Сите права се задржани. Текстот е личен став на Авторот.
