Кандидатите за градоначалници деновиве ја презентираа својата изборна програма, фокусирајќи се на инфраструктурни подобрувања, спортски и еколошки проекти, како и услуги за ранливите категории граѓани.
Меџити ќе инсталира модерни лифтови во стари згради во Чаир
Кандидатот на ВРЕДИ за градоначлник на Општина Чаир, Изет Меџити на денешната прес-конференција најави инсталирање на модерни лифтови во постарите станбени згради со четири и пет спратови во Чаир.
Меџити потенцира дека првичната анализа говори дека постојат технички услови, нагласувајќи дека без никакви поголеми интервенции може да се изградат и инсталираат 81 лифт наменети за 81 влез во 31 зграда.
„Независни заедно“: Возобновување на СРЦ Кале и ефикасни политики за управување со отпадот
Некогашниот бисер на градот, Спортско-рекреативниот центар Кале, е руиниран и пред распаѓање, а просторот околу него е претворен во дива депонија која се наоѓа на околу 300 метри воздушна линија од Владата на Република Македонија и во срцето на Општина Центар. Од тука испраќаме порака дека СРЦ Кале треба да добие сосема друга улога од оваа што ја има денес, изјавија кандидатите од Граѓанската платформа „Независни заедно“.
Билјана Ивановска, независен кандидат за градоначалник на општина Центар од „Независни заедно“ истакна дека во Центар ќе се промовира здравјето на граѓаните, а спортот, рече, е еден од условите да го одржуваме нашето здравје.
Герасимовски: Итно копче 24/7, бесплатни стоматолошки прегледи и домашна нега за пензионерите
Кандидатот за втор градоначалнички мандат и актуелен градоначалник на Општина Центар, Горан Герасимовски, го посети пензионерот Благоја Јошевски, корисник на услугата „Итно копче“. Јошевски, кој живее сам, истакна дека токму оваа услуга му дава сигурност и мир, бидејќи секогаш може да побара помош со едно притискање на копче. Оваа бесплатна услуга, реализирана во соработка со Црвениот крст, во Центар ја користат 23 лица над 65 години, кои живеат сами или се со нарушено здравје, се наведува во соопштението од кандидатот за градоначалник на СДСМ Горан Герасимовски.
„Итно копче се користи во кризни ситуации и може да спаси живот. Со едно притискање се алармираат службите за брза реакција и итна медицинска помош,“ рече Герасимовски.
Коалиција за зелена иднина: Тораница и Крива Река – доказ за владината и локалната негрижа
Коалицијата за зелена иднина реагира со најостра осуда на повторното заматување на Крива Река и на сомнежите за нова хаварија во рудникот „Тораница“. Доколку се потврдат информациите за истекување на јаловина и/или други токсични супстанци, тогаш ќе имаме пред себе еколошка катастрофа која очигледно ќе остане неказнета само затоа што институциите избрале молк како „одговор“. Централната и локалната власт покажуваат системска неспособност и отсуство на политичка волја кога станува збор за заштита на животната средина и здравјето на граѓаните, се наведува во соопштението од Коалицијата за зелена иднина.
Османи: Ревитализација на спортските сали и изградба на нови терени за граѓаните на Чаир
Кандидатот за градоначалник на Општина Чаир, Бујар Османи, на денешната прес-конференција ги презентираше конкретните спортски проекти предвидени во неговата изборна програма, нагласувајќи дека приоритет ќе биде целосната ревитализација на спортската инфраструктура и создавање достапни спортски зони за сите граѓани, се наведува во соопштението од ДУИ. Османи најави дека најпрво ќе се започне со реконструкција на постојните спортски сали и терени, со цел тие повторно да станат достапни за спортистите и граѓаните на Чаир.
„Спортската сала ‘Енвер Идризи’ во Серова, со сите неопходни подобрувања што ќе овозможат понуда и спортски услуги согласно стандардите. Спортската сала ‘Васил Главинов’, итна интервенција, иако знаете дека ‘Васил Главинов’ е дел од големиот проект на Мишел Ројкинд, кој опфаќа ново училиште, нова градинка, подземен паркинг и детско игралиште“, изјави Османи.
Митевски: Нови спортски центри и забавен парк во Петровец
Кандидатот за градоначалник на Петровец, Борче Митевски, во гостување на Радио Лидер, говореше за поддршката што ја добива од граѓаните, без разлика на политичката, етничката или националната припадност. Митевски истакна дека во деловите со мнозинство на албански граѓани победува со 10 спрема 1, бидејќи тоа што го ветува и го реализира, се наведува во соопштението од ВМРО-ДПМНЕ.
Во следните 4 години, Митевски најави нов забавен парк во училиштето во вредност од 4 милиони денари, каде што има и теретана на отворени и спортски терен. Планирано е да се направи и терен за баскет со трибини, како и терен за фудбал со вештачка трева.
„Тоа ќе биде еден мини спортски центар, каде што ќе можат граѓаните од најмала возраст до поголема возраст, сите да бидат во тој круг, бидејќи е голема површината и место каде што сите ќе го најдат својот мир, а младите да се забавуваат’’, најави Митевски.
Д.М.
