Израелски воени авиони извршија бран напади во Газа вчера, при што загинаа најмалку 38 Палестинци, според болнички службеници, додека разговорите за прекин на огнот на опустошената територија достигнаа критична точка, пренесе Гардијан.
Службениците во болницата Насер во јужниот град Кан Јунис изјавија дека 18 лица се убиени во нападите во ал-Маваси, блиска крајбрежна област преполна со шаторски кампови на раселени лица од борбите на други места.
Според Министерството за здравство во Газа, 80 лица се убиени, а 304 се ранети во израелските напади таму во последните 24 часа.
Според Гардијан, синоќа израелската војска, исто така, соопшти дека нападнала цели на Хутите во пристаништата Ходеида, Рас Иса и Салиф, како и електраната Рас Кантиб во Јемен.
Ова беше одговор на повторените напади од страна на групата поврзана со Иран врз Израел, соопшти израелската војска.
Израел ја ескалираше својата офанзива во Газа во последните денови, додека моментумот собира интензитет во преговорите за предлогот спонзориран од САД што би можел да доведе до крај на 21-месечната војна.
Зборувајќи пред да го напушти Израел на разговори со Доналд Трамп во Вашингтон за прекинот на огнот и други регионални прашања, Бенјамин Нетанјаху синоќа изјави дека е решен да обезбеди враќање на заложниците држени во Газа и да ја отстрани заканата од Хамас за Израел, повторувајќи ги ветувањата што ги дал повеќе пати во текот на конфликтот.
Д. Т.
