ТЕМА НА ДЕНОТ
На Денот на независноста на Република Северна Македонија, вчера( 8 септември), министерката за труд и социјални прашања на Србија придружена со делегација и во присуство на вицепремиерот Иван Стоилковиќ, ја одбележа годишнината од битката на Кајмакчалан, со српско, црногорско и грчко знаме. Настанот беше одбележан со исклучително провокативен говор во кој меѓу другото, ги прогласи Битола и Охрид за српски градови.
Реакција пристигна од Алијансата за Албанците, во која се вели претставува официјално одобрение од Владата на Северна Македонија за сè што се случи и што го кажа српскиот министер. Целата церемонија беше проследена со српска полиција и војници, што симболизира окупација на земјата и го крши Уставот и суверенитетот.
Од АА сметаат дека овој чин ги потврдува сите нивни предупредувања дека Владата на ВМРО-ЗНАМ ја прави Северна Македонија дел од српскиот свет, додека албанските партии од ВЛЕН сега го легитимираат и го оправдуваат тоа со конкретни акции.
Овие акции целосно ја менуваат ориентацијата на земјата, од независна држава на сите граѓани, во српска покраина, од европска земја и членка на НАТО, во полигон на Србија и Русија, алармираат од АА.
Српскиот министер за одбрана, Братислав Бата Гашиќ, поранешен директор на БИА (српската УДБА), во видео тврди дека Кајмакчалан е српска земја. Ова тој го изјави во присуство на Иван Стоиљковиќ, вицепремиер во владата на Мицкоски.
За жал, Република Северна Македонија, откако сама го блокираше својот пат кон ЕУ, влезе во наративот на “српскиот свет”, изјави за ЦивилМедиа, Џелал Хоџиќ, претседателот на СДА Македонија.
Наративот на “српскиот свет” е составен во голема мерка од пропагандата на големосрпската политика, која уште има за цел промени на границите на државите од Западен Балкан. И Северна Македонија тука не е исклучок, смета Хоџиќ.
Според него, пропагандата на големосрпската политика прави проблеми и во Босна и Херцеговина, Црна Гора, Косово, па и во Северна Македонија.
Она што нас треба сериозно да нѐ загрижува е дека во БиХ, Црна Гора и Косово можете да видите организирано спротивставување од политичките претставници на Бошњаците, Црногорците, Албанците… како и од етничките Срби кои државите во кои живеат ги гледаат како членки на НАТО и ЕУ, вели претседателот на СДА Македонија.
Тоа што е специфично за Северна Македонија е дека политичките претставници на Македонците едноставно со премолчување го дозволуваат дивеењето на големосрпската пропаганда во нашата држава, додава Хоџиќ.
РЕГИОН
Лидерите на Европската зелена партија бараат од тројцата лидери на ЕУ јавно да го осудат Вучиќ по неговите навреди
Петте највисоки членови на Европската зелена партија денес побараа од лидерите на Европската унија „јавно да ги осудат личните навреди, заканите за кривично гонење, заплашувањето и кампањата за дезинформации“ од страна на претседателот на Србија, Александар Вучиќ, на сметка на европските политички претставници и демократските актери, но и да „ги бранат европските вредности и да покажат поддршка за граѓаните на Србија“
СВЕТ
Падна француската влада откако пратениците гласаа за разрешување на премиерот Бајру
Франција е втурната во нова политичка криза откако пратениците гласаа за разрешување на премиерот Бајру.
Францускиот претседател Емануел Макрон ќе именува нов премиер „за неколку дена“, вели неговиот кабинет – кој е во трката?
Премиерот Франсоа Бајру го нарече изненадувачкото гласање за доверба по огромното противење на неговите буџетски планови
ПРАШАЊЕ НА ДЕНОТ
Кој е виновен за состојбата на „Вардариште“?
Протестите на жителите на Аеродром и активистите повторно го актуелизираа прашањето: ќе остане ли „Вардариште“ уште едно политичко ветување без реализација, или конечно ќе започне процес на трајна санација и пренамена во корист на граѓаните?
ИЗБОРИ
Во тек е повикот на ЦИВИЛ за краткорочни или долгорочни изборни набљудувачи. Крајниот рок за пријавување е 15 септември, 17 часот.
Набрзо по селекцијата на набљудувачи, ќе се одржат и семинари за обука на набљудувачите кои ќе се одржат на почетокот на октомври. Обуките се задолжителни за сите избрани набљудувачи, без оглед на тоа дали биле набљудувачи на ЦИВИЛ и во некој од претходните изборни циклуси. На обуките ќе бидат потпишан договор за ангажман со коj набљудувачите се обврзуваат да бидат непристрасни и објективни.
Долгорочните изборни набљудувачи на ЦИВИЛ се ангажираат во период од шест недели и имаат работни задачи што се однесуваат на целата изборна единица што им е доделена. На денот на гласање тие ги координираат активностите и на краткорочните набљудувачи во нивната изборна единица.
Краткорочните набљудувачи се ангажираат на денот на гласањето во првиот круг и – таму каде што е потребно – во вториот круг на локалните избори.
СЛОБОДНА ЗОНА
„Војната на Русија не завршува на границите на Украина. Хибридната војна – комбинација на конвенционална сила и прикриени, неконвенционални тактики – стана трајна карактеристика на стратегијата на Кремљ за слабеење на европската кохезија, нарушување на критичната инфраструктура, разнишување на довербата во демократските институции и влијание врз политичките процеси, а сето тоа без да ја премине линијата на отворена војна.“, пишува Џабир Дерала во првиот дел од анализата „Руската хибридна војна против Европа (1): Европа конечно признава дека е нападната“.
„Токму овој недостаток од демократија, одговорност и совесност нѐ прави да не сме независна држава. Таа демократија започнува во партиските структури. Всушност, по дефиниција, напоменувам, по дефиниција, партиите се креатори и најзадолжени за создавање на демократски амбиент за функционирање на државата и заштита на нејзините граѓани. На сите граѓани, не на поединци кои се на чело на политичките партии.“, пишува Оливер Андонов во колумната „Зависна независност“.
„Ако има тема која се рециклира со секоја промена на власта, кога тоа и ѐ потребно на гарнитурата на власт или кога опозицијата е моќна да ги користи службите , тоа е употребата на безбедносните служби. Тие не треба да се употребуваат туку да ја вршат својата со закон определена надлежност. Со подзаконски акти е пропишана и процедурата на нејзината внатрешна активност.“, пишува Војо Маневски во колумната „Зошто се злоупотребуваат тајните служби?“.
„Српскиот свет“ не е културна игра или верски проект. Тоа е стратешка операција. Денес преку паради, церемонии и симболика, утре преку институции и политички структури ( не сум сигурна за утре, повеќе е сега). И секој што молчи пред оваа провокација станува дел од бришењето на македонскиот идентитет, кој се брани со мечеви и копја од Бугарите и сите други, освен од браќата Срби!, пишува Дијана Тахири, во колумната „Идентитетот во селективен процес на умирање: „Српски свет“ со официјален печат на македонската власт“.
Подготви: Д. Тахири
