„ЈСП, до кога ние патниците ќе ја трпиме тортурата од ваша страна? Зарем ние ,,обичните смртници”, што се возиме со автобус немаме никакви права, никакво достоинство?
Испровоцирана сум од настан, пред три часа, при враќање од работа, во кој како повеќето ,,обични смртници” одам и се враќам од работа со автобус. Автобус со возен ред од Шуто Оризари до Карпош, односно, автобусот 19, иако веќе подолго време не се внимава на возниот ред кој е објавен на официјалната страна на ЈСП, а кој според возниот план треба да го има на секои 15 минути, ние, патниците во нормални услови го чекаме од 25-30 минути.
Но, она што се случи денеска ги премина сите граници, покрај тоа што автобусот го чекавме половина час за да пристигне, по пристигнувањето само застана за да се симнат патниците и го продолжи својот пат, без да почека да се качат патниците кои веќе половина час го чекаа и кои беа во поприличен број, и по сето ова голем број патници меѓу кои и јас останавме да го чекаме наредниот автобус кој дојде после 45 минути. Да, да, после цели 45 минути.
Дали ќе има одговорност за ова што се случува, секојдневно, и не само со 19, ова се случува и со другите автобуски линии, во кој покрај тоа што доцниме со нашите секојдневни обврски, големи се и шансите да можеме да се заразиме поради целокупната ситуација со вирусот и гужвите, доволно е еден да е заболен за сите да се заразиме.
Дали некој ќе сноси последици за ова што се случува и дали некој воопшто ја контролира целокупната ситуација? Како ќе ни ги надоместите штетите и лошите услови кои ги трпиме од ваша страна, а кои ние патниците за неплатена карта плаќаме штета со казна од 1000 денари, а реално ниту картата од 35 денари не ја заслужувате.
Уште слушам имало предлог за редуцирање на автобусите, се надевам дека не го знаат значењето на зборот редуцирање и со тоа мислат да го зголемат бројот на автобуси.“
Доколку се воведат нови рестриктивни мерки, препорака до
ЈСП Скопје е да не ги редуцира дополнително автобусите и намалува бројот на линиите, напротив, треба да размисли за зголемување на бројот на автобуси и линии со што ќе се намали секојдневната гужва, а истовремено ќе се намали времето на чекање по автобуските постојки. На тој начин ќе се зголеми и безбедноста, но и заштитата на граѓаните од Ковид-19.