СИМОНА АТАНАСОВА / ВИСТИНОМЕР
За да се спречи создавањето на нови соеви, ширењето на постоечките и за да се постигне колективен имунитет, здравствените власти ширум светот апелираат граѓаните масовно да се вакцинираат против коронавирусот, а тоа ги вклучува и децата.
Од Министерството за здравство за „Вистиномер“ информираат дека досега (11.12.2021 г.), прва доза вакцина примиле 6.204 малолетни лица а ревакцинирани се 5.495 деца.
Вакцинацијата на малолетници на возраст од 12 до 17 години кај нас започна да се применува на 19 јули оваа година. Вакцината не е обврзувачка, се аплицира на доброволна основа во согласност со родителите. Вакцината „Фајзер“ е единствената вакцина која е дозволена за вакцинација за оваа возрасна група.
Единствен начин да стигнеме до колективен имунитет е и децата да се вакцинираат, изјави летото министерот за здравство, Венко Филипче.
Младите и адолесцентите се изложени на мал ризик од тешка болест, хоспитализација и смрт како директен резултат на инфекцијата, но придонесуваат во ширењето на болеста кај другите возрасни категории.
Според неделниот извештај на Институтот за јавно здравје (за период 29.11.2021 – 05.12.2021), со коронавирус биле заболени 14.052 лица на возраст од 10 до 19 години лица. Кај децата од 0 до 9 години досега е регистрирани 4.791 случај на заболување.
Извор: ИЈЗ
Досега во нашата држава починати се три малолетни лица заболени со ковид-19, сите три лица се невакцинирани, велат од ресорното министерство за „Вистиномер“.
На прашањето дали Министерството за здравство размислува да воведе вакцинација и кај деца помали од 12 години, односно кај возрасната група од 5 до 12 години, како што тоа го направија повеќе земји во светот, од здравство велат дека засега не е планирано такво нешто.
Националната комисија за имунизација ги следи препораките и засега нема измена на препораката за вакцинација на малолетни лица во нашата земја, велат од МЗ.
ДЕЦАТА И АДОЛЕСЦЕНТИТЕ ПОМИНУВААТ СО ПОБЛАГИ СИМПТОМИ НА КОВИД-19
Смртните случаи кај лица помали од 25 години претставуваат помалку од 0,5 отсто од пријавените глобални смртни случаи, покажуваат податоците на Светската здравствена организација. Децата и адолесцентите најчесто развиваат помалку и поблаги симптоми на инфекција со САРС-КоВ-2 во споредба со возрасните и имаат помала веројатност од возрасните да доживеат тежок ковид-19. Постојат неколку фактори на ризик за тежок ковид-19 кај децата, вклучувајќи постара возраст, дебелина и веќе постоечки здравствени состојби како дијабетес, астма, срцеви и белодробни заболувања и невролошки, невро-развојни (особено Даунов синдром) и невромускулни состојби.
Земјите треба да ги земат предвид индивидуалните и популациските придобивки од имунизацијата на децата и адолесцентите во нивниот специфичен епидемиолошки и социјален контекст кога ги развиваат нивните политики и програми за имунизација против ковид-19. Бидејќи децата и адолесцентите имаат тенденција да бидат со поблаги симптоми во споредба со возрасните, освен ако не се во група со поголем ризик од тежок ковид-19, помалку е итно да се вакцинираат од постарите луѓе, оние со хронични здравствени состојби и здравствените работници, велат од СЗО.
НАД 100 ЗЕМЈИ ГО ВАКЦИНИРААТ МАЛОЛЕТНОТО НАСЕЛЕНИЕ ПРОТИВ КОВИД
Европската агенција за лекови (ЕМА) кон крајот на мај дозволи вакцинација на деца над 12 години со вакцината на „Бионтек“/ „Фајзер“, а од 13 декември и за оние на возраст од пет до 11 години. Пред околу еден месец во САД започна вакцинацијата на децата на возраст од 5 до 11 години.
Повеќе од 100 земји го вакцинираат своето малолетно население против ковид-19. Според извештајот на УНИЦЕФ, кој анализирал 115 милиони потврдени случаи на ковид-19 од 105 земји, лицата под 20 години сочинуваат 16 отсто од пријавените заболени случаи.
Во Франција од средината на јуни се вакцинираат деца од 12 до 17 години, а деца од 5 до 11 години само ако се во ризична група или живеат со ранливи категории на граѓани. Се вакцинираат со вакцинате на „Фајзер„, а предуслов за вакцинација на децата против корона е да има официјална согласност и од детето и од родителите. Германија, најверојатно ќе почне со администрација на вакцини на деца под 12 години од почетокот на 2022 година, откако во август одобри за тинејџери.
Во јуни годинава Кина ги одобри за итна употреба вакцините „Синовак“ и „Синофарм“ за деца и млади на возраст од 3 до 17 години, и стана прва земја во светот која дозволи вакцинација против ковид-19 за мали деца.
Од септември Камбоџа започна да ги вакцинира децата на возраст над шест години со кинеската !„Синовак“. Оваа фармацевтска компанија, исто така, започна клинички испитувања кај 14.000 деца на возраст од шест месеци до 17 години во Чиле, Кенија, Малезија, Филипини и во Јужна Африка. Обединетите Арапски Емирати и Бахреин почнаа да ги нудат „Синофарм“ и „Фајзер“ на деца на возраст од три до 17 години.
Според податоците на Европскиот центар за превенција и контрола на болести (ECDC), заклучно со 10 декември 2021 година, во европските земји целосно се вакцинирале вкупно 16,5 отсто од младите луѓе под 18 години, а 21 отсто примиле една доза. Од европските земји, Португалија има најголем процент на вакцинирани малолетници 29,4 отсто, потоа следуваат Данска, Шпанија, Исланд и Малта со 26 отсто. Последна на листата се соседна Бугарија со 1,3 отсто вакцинирано малолетно население и Хрватска со 2,3 отсто вакцинирани од оваа возрасна група.
Широко распространетата вакцинација против ковид-19 е клучна алатка за сите најдобро да се заштитат сите од болеста и компликации поврзани заразувањето, смета американскиот Центар за контрола и превенција на болести (ЦДЦ). Децата и тинејџерите кои се целосно вакцинирани можат безбедно да продолжат со многу активности што ги правеле пред пандемијата.
Од Универзитетот Џон Хопкинс сметаат дека вакцинирањето на децата освен што може да помогне да се заштитат оние кои се поподложни на тешки последици од инфекцијата, може да помогне да се спречи појавата на други варијанти.
Намалувањето на преносот на вируси со вакцинирање ја намалува и шансата на вирусот да мутира во нови варијанти кои може да бидат уште поопасни, велат оттаму.
Овој напис е изработен во рамките на Проектот за брзо справување со вакциналните дезинформации, имплементиран од Фондацијата Метаморфозис. Тој е првично објавен во Вистиномер, а e овозможен со поддршка на Балканскиот фонд за демократија, проект на Германскиот Маршалов фонд на САД (BTD – The Balkan Trust for Democracy, a project of the German Marshall Fund of the United States). Содржината на написот е одговорност на авторот и не секогаш ги одразува ставовите на Метаморфозис, БТД или нивните партнери.
