Оваа недела на политичката сцена секако ќе остане забележано свикувањето на Конститутивната седница на Собранието за 4 август, со посебни протоколи поради коронавирусот. Коститутивна седница, според Деловникот на Собранието се свикува за формирање на Верификационата комисија, по предлог од претседавачот, во случајов, претседателот на Собранието, Талат Џафери, до преземање на должноста на новоизбраниот претседател.
Верификационата комисија се состои од претседател и четворица членови, од редот на пратениците кои припаѓаат на различни политички партии застапени во Собранието кои врз основа на извештајот на Државната изборна комисија за избор на секој пратеник поднесува писмен извештај со предлог за верификација на мандатот на секој пратеник одделно.
Од овој момент Собранието ќе чека прием на известувањето од претседателот на државата за кандидатот за претседател на Владата или мандатар, по што има рок од три дена да ги извести пратениците.
Мандаторот, во рок од 20 дена од денот на доверувањето на мандатот, на Собранието му поднесува предлог за состав на Владата и програма, а во рок од 15 дена се одржува седница за избор на Владата, од денот на приемот на предлогот за состав на Владата и програмата. По јавниот претрес во Собранието, гласањето за предлог на Влада се врши истиот ден најдоцна до полноќ.
Според изборните резултати, официјално објавени на 25 јули, со доделување на уверенија на новоизбраните пратеници, СДСМ освои 46 пратенички мандати, ВМРО-ДПМНЕ 44, ДУИ 15, Коалицијата Алијанса за Албанците и Алтернатива 12, Левица два и ДПА еден мандат. Ваквата тесна разлика меѓу двете најголеми политички партии и нивните коалиции остава простор за калкулации како ќе се формира новата Влада.
Техничкиот премиер и потпретседател на СДСМ, а со изборните резултати и иден пратеник во Собранието, Оливер Спасовски, изјави дека многу скоро ќе се формира новата Влада и тоа без нови избори, како што најави Христијан Мицкоски.
„Мицкоски секој ден ги менува ставовите. Нели до пред некој ден велеше дека тој ќе формира влада, дека составува парламентарно мнозинство. Сега вели нови избори. Тоа е сепак негова работа. Изборите поминаа. На нив има јасен победник. Тоа е СДСМ. Ние ќе ја формираме новата влада“, изјави Спасовски за „Утрински брифинг“.
Официјалните разговори за формирање Влада ќе започнат веднаш по 2 август, а како што рече Спасовски, разговорите со политичките партии, сега за сега, се околу парламентарното мнозинство.
Мицкоски и ВМРО-ДПМНЕ, од друга страна, оваа недела се определија фокусот на јавноста да го свртат кон обвинувања за изборен поткуп од власта. Остана забележана и неговата изјава, во која ги најави изборите наесен ако ниту тој, ниту Зоран Заев не успеат да формираат Влада. Овие изјави Спасовски ги нарече небулозни.
Клучна улога за формирање на парламентарно мнозинство ќе има и ДУИ, а со тоа и кој и како ќе ја формира новата Влада. ДУИ очекува покана од СДСМ, а како што изјавил Бујар Османи во интервју за косовската телевизија Т7, не е исклучена можноста и за коалиција со ВМРО-ДПМНЕ.
Зијадин Села од Алијанса за Албанците, пак, изјави дека ако тие почнат со преговори, еден од условите ќе биде албанскиот јазик да влезе во Уставот, а не како сега, да се води како јазикот на над 20 проценти од населението.
Претседателот на Република Северна Македонија, Стево Пендаровски, во интервју за Фокус изјави дека кој ќе партиципира во владата зависи од преговорите што ќе ги водат партиите што обезбедија влез во парламентот. Според него возможна е и Влада без СДСМ или без ВМРО-ДПМНЕ, а и без ДУИ како трета партија според бројот на освоени мандати.
Своја порака остави и Сашо Мијалков, кој спонзорирано започна со внатрепартиско подбуцнување во ВМРО-ДПМНЕ, на сметка на лидерството на Мицкоски.
„На сите овие избори, вклучително и на последните ти си тој што директно одработи за СДСМ“, вели Мијалков, кој порачува дека доколку се бира партиски лидер по теркот на СДСМ, Мицкоски би бил идеален: „уште десет пати по ред те згазат на избори а ти да ја бараш вината за поразите на друго место, а не во себе и луѓето со кои соработуваш“.
Неизвесноста продолжува.
Б. Јордановска
