Специјалната обвинителка Катица Јанева изјави дека дала одобрение да му биде вратен пасошот на одредено време на бизнисмениот Орце Камчев, бидејќи тој требало да учествува во некој управен одбор во странство, но не прецизираше каде.
„Не би сакала да бидам адвокат на Орце Камчев во смисла на тоа да го бранам. Сметавме дека е потребно да му се даде пасошот бидејќи истрагата во делот на прибирање на финансиската документација е прибрана и се анализира во моментот“, изјави Јанева.
Јанева додаде дека соработуваат и адвокатите и другите обвинети во предметот и дека поентата на СЈО е да истражи дали има коруптивни елементи и валкани пари во делот на високите функционери.
Специјалната јавна обвинителка посочи дека обвинителството дава само мислење, а судот е тој кој ја донесува одлуката за враќање на пасошот.
Од Кривичниот суд појаснуваат дека на осомничениот во „Империја“ времената патна исправа му е дадена по добиено позитивно мислење од СЈО, кое морале да го почитуваат.
„Осомничениот, преку своите бранители, до судија на претходна постапка има поднесено барање за издавање на патна исправа со ограничен рок од 8 месеци важност, а заради неодоложни службени патувања кои ги има како член на управен одбор и задолжителна едукација, за што доставил и докази во прилог на барањето.
Согласно одредбите до ЗКП, судијата на претходна постапка се обратил до надлежниот јавен обвинител од каде е добиено позитивно мислење да се издаде патна исправа со ограничен рок од 8 месеци важност“, се вели во соопштението на судот.
Оттаму додаваат дека со оглед на добиеното позитивно мислење, судот во текот на минатиот месец, со писмо го известило Министерството за внатрешни работи дека дава согласност да се издаде патна исправа со ограничен рок, но со важност од 6 месеци, заклучно со последната служена обврска на осомничениот, а согласно член 41 од Законот за патни исправи, – МВР во управна постапка издава патни исправи со ограничен рок по добиена согласност од надлежниот суд.
„Уште еднаш потенцираме дека согласно член 144 ст. 2 од ЗКП судот нема можност да не почитува согласност или предлог на надлежен обвинител и да изрекува потешки мерки за обезбедување присуство ако истата цел може да се постигне со поблаги мерки, па во таа смисла и постапувал.
Затоа ја информирма јавноста дека судот постапувал исклучиво според Законските одредби како и мислењето дадено од надлежниот обвинител, а што се однесува до мерката за обезбедување присуство определна со решение на Апелациониот суд – Скопје, односно одземање на двете патни исправи на осомничениот, истата сеуште е активна и двете патни исправи се депонирани во судот“, се додава во соопштението.
А. П.
