ДЕХРАН МУРАТОВ
Пратениците на Левица вчера во Собранието не гласаа за усвојување на Декларацијата за осуда на воените напади кои го загрозуваат територијалниот интегритет и суверенитет на Украина, бидејќи според пратеникот Борислав Крмов „убаво се гледа“ дека таргет на руските тенкови, куршуми, гранати, се само воената инфраструктура и војска на Украина.
Камо среќа сите ние да ги имавме очите или „розевите очила“ на овие „левичари“ па да гледавме дека од руските цевки излегуваат цвеќиња и љубов и дека не уништуваат цели населби, не убиваат цивили, (меѓу кои жени и деца), да можевме „убаво да гледаме“ дека руските агресори не пљачкосуваат низ украинските локали (кои сè уште не се разурнати, засега).
Говорот на пратеникот на Левица од македонската собраниска говорница, наликуваше како да го чита соопштението од Кремљ, кој беше пренесен од речиси сите македонски медиуми, а богами доби прилично добра минутажа во ударните вести, што е уште една потврда дека руските медиуми не се единствените што ја пренесуваат и оправдуваат војната во Украина, туку и нашите „проруски гласила“.
Среќа што нашето општество е демократско, а медиумите непристрасни или народно кажано „5 минути за Евреите и 15 минути за Хитлер“, и се дозволува на секој да каже што сака, па дури и да шири пропаганда… Со вакво темпо „проруските гласила“ можеби и ќе успеат да нè убедат дека нема војна во Украина, туку се снима некој акционен филм. За жал, најверојатно ќе се снимаат филмови – документарни!
Се поставува прашањето – ќе се исклучи ли микрофонот на „Раша тудеј“ во македонското (општество) Собрание!?
Сите права се задржани. Текстот е личен став на Авторот.
